कर्जाला कंटाळून शिरसोली येथे तरुणाची आत्महत्या

जळगाव : डोक्यावर कर्जाचा डोंगर, त्यातच आजारपण यामुळे नैराश्यात आलेल्या शिरसोली प्र.न. येथील देविदास प्रकाश गायकवाड (वय ३२) या युवकाने राहत्या घरात गळफास घेत आत्महत्या केल्याची घटना मंगळवारी दुपारी घडली.

नातेवाइकांकडून मिळालेली माहिती अशी की, देविदास प्रकाश गायकवाड हा तरुण व पत्नी शेतात मजुरीचे काम करून कुटुंबाला हातभार लावत होता. त्यांनी बचतगटाच्या माध्यमातून कर्ज काढले होते. अशातच देविदास याच्या पायाला दुखापत झाल्याने त्याला हालचालदेखील करता येत नव्हती. त्यामुळे अनेक दिवसांपासून तो नैराश्यात होता. मंगळवारी राहत्या घरात छताला गळफास घेत आपली जीवनयात्रा संपविली.

ही घटना मुलाच्या लक्षात आली. त्याने आईला सांगितले असता, त्यांनी तत्काळ घरी धाव घेतली. दरम्यान, परिसरातील ग्रामस्थांनी त्याला तत्काळ खाली उतरवीत शासकीय महाविद्यालयात दाखल केले. या ठिकाणी वैद्यकीय अधिकाऱ्यांनी मयत घोषित केले. या प्रकरणी एमआयडीसी पोलिसात अकस्मात मृत्यूची नोंद करण्यात आली आहे.