जळगाव जिल्हा क्रीडा संकुलातील जलतरण तलावात बुडून युवकाचा मृत्यू

पोहणाऱ्यांच्या गर्दीत मित्रांच्याही आले नाही लक्षात : क्रीडा संकुलातील दुसरी घटना

जळगाव : छत्रपती शिवाजी महाराज क्रीडा संकुलातील जलतरण तलावात बुडून एका युवकाचा मृत्यू झाल्याची घटना रविवारी सायंकाळी ५ वाजता घडली. याप्रकरणी जिल्हा पेठ पोलिस स्टेशनमध्ये आकस्मिक मृत्यूची नोंद करण्यात आली आहे. सलमान शकील बागवान (वय २४, रा. जोशीपेठ, बागवान वाडा) असे मृत झालेल्या युवकाचे नाव आहे.

सलमान बागवान गेल्या अनेक वर्षांपासून फळ विक्रीचा व्यवसाय करीत होता. बागवान वाड्यात आई, वडील शकील बागवान, मोठा भाऊ व तीन बहिणींसोबत तो राहत होता. रविवारी फळ विक्रीचा व्यवसाय बंद असल्याने, सलमान सुटीच्या निमित्ताने सायंकाळी ४ वाजेच्या सुमारास मित्रांसोबत जलतरण तलावात पोहायला आला होता. त्यातच रविवारची सुटी असल्याने जलतरण तलावात पोहणाऱ्यांची संख्यादेखील जास्त होती. मित्रांसोबत पोहत असतानाच सलमान तलावातील जास्त खोलीच्या भागात पोहोचला व त्याठिकाणी खोलीचा अंदाज न आल्यामुळे तो बुडाला.

सलमान बुडत असल्याचे काही मित्रांच्या लक्षात आले. जलतरण तलावातील सुरक्षारक्षकांना बोलावून सलमानला तातडीने जिल्हा रुग्णालयात दाखल करण्यात आले. मात्र, त्याठिकाणी डॉक्टरांनी सलमानला मृत घोषित केले. जिल्हा रुग्णालयात जोशी पेठ व बागवान वाड्यातील सलमानचे नातेवाईक व मित्रांनी मोठी गर्दी केली होती.

प्रशिक्षकांच्या दुर्लक्षामुळे मृत्यू झाल्याचा आरोप

जलतरण तलावाच्या ठिकाणी दररोज अनेक मुलं पोहायला येतात. त्यामुळे याठिकाणी प्रशिक्षकांनी व्यवस्थित लक्ष दिले पाहिजे होते, असे मत सलमानच्या नातेवाईकांनी व्यक्त केले. तसेच जलतरण तलावाच्या ठिकाणावरील बचाव कर्मचारी, सुरक्षारक्षक मोबाइलमध्ये व्यस्त होते. तसेच प्रशिक्षकांच्या दुर्लक्षामुळेच हा मृत्यू झाल्याचा आरोप नातेवाईकांनी केला. दरम्यान, क्रीडा संकुलातील जलतरण तलावात बुडून मृत्यू झाल्याची ही दुसरी घटना आहे.