बांग्लादेशी वृत्तपत्रानं काढली भारतीय खेळाडुंची इज्जत, छापला अर्धमुंडीत फोटो
By admin | Published: June 30, 2015 01:57 PM2015-06-30T13:57:20+5:302015-06-30T13:57:20+5:30
भारतीय क्रिकेटपटुंचे अर्धमुंडन केल्याचं दाखवलेला फोटो पहिल्या पानावर छापून प्रोथोम आलो या बांग्लादेशच्या राष्ट्रीय पातळीवरील दैनिकानं भारताच्या जखमेवर मिठ चोळले आहे.
बांग्लादेशी वृत्तपत्रानं काढली भारतीय खेळाडुंची इज्जत, छापला अर्धमुंडीत फोटो
Next
ढाका, दि. ३० - भारतीय क्रिकेटपटुंचे अर्धमुंडन केल्याचं दाखवलेला फोटो पहिल्या पानावर छापून प्रोथोम आलो या बांग्लादेशच्या राष्ट्रीय पातळीवरील दैनिकानं भारताच्या जखमेवर मिठ चोळले आहे. भारतीय फलंदाजीची ऑफ कटरवर वाताहत करणा-या मुस्ताफिझुर रेहमानच्या हातात कटर आहे आणि ढोणी, कोहली, रोहीत, रहाणे, अश्विन आणि जाडेजा यांचं अर्ध मुंडन केलेलं आहे असा हा फोटो असून भारतीय खेळाडुंची येथेच्छ खिल्ली उडवली आहे.
बांग्लादेशने भारतावर २-१ असा ऐतिहासिक विजय मिळवला आणि बांग्लादेशमध्ये आनंदाला उधाण आलं. परंतु, आत्तापर्यंत इतक्या खालच्या पातळीवर कुणी उतरलं नव्हतं. हे पुरे झालं नाही म्हणून भारतीय खेळाडुंच्या तोंडी हा कटर आम्ही वापरून बघितला आहे, तुम्हीपण बघा असं वाक्यही घालण्यात आलं आहे.
आत्तापर्यंत तरी भारताचे मैदानावर व मैदानाबाहेर बांग्लादेशशी सौहार्दाचे संबंध राहिले आहेत. बांग्लादेशचे अनेक खेळाडू भारताच्या आयपीएलमध्ये खेळतात. पाकिस्तानशी भारताचं मैदानावर आणि बाहेरही युद्ध चालत आलेलं आहे. आता, पाकिस्तानची जागा बांग्लादेश घेतंय की काय अशी शंका व्यक्त होत असून भारतीय माध्यमांमध्ये काय प्रतिक्रिया उमटतात हे बघणं औत्सुक्याचं ठरणार आहे.
