पतीने मांस खाल्ल्याने पत्नीचा घटस्फोसाठी अर्ज

अहमदाबाद, दि. 22 - 23 वर्षीय महिलेने आपला पती मांसाहार करत असल्याने घटस्फोटाची मागणी केली आहे. आपल्या पतीने लग्नाआधी मांसाहार न करण्याचं दिलेलं वचन तोडल्याचा आरोप करत महिलेने घटस्फोटासाठी अर्ज केला आहे. सोला येथे राहणा-या रिमा दोशी यांनी आपला पती गेल्या पाच वर्षांपासून आपल्यावर अत्याचार करत असल्याची तक्रार पोलिसांत केली आहे. रिमा दोशी जैन धर्मातील असून पुर्ण शाकाहारी आहे. आपल्या पतीने जेवणाच्या सवयींमध्ये बदल न केल्याने अखेर रिमा यांनी हे पाऊल उचललं आहे. 

 

सहा वर्षापुर्वी रिमा आणि करण चंदेला यांचं प्रेम प्रकरण सुरु झालं होतं. करण सोला येथील रिमाच्या घरासमोर कॉम्प्यूटर ऑफिरसमध्ये काम करायचा. मूळचा बिहारचा असणारा करण मांसाहारी होता. आपल्या समाजात मांसाहारावर बंदी असल्याने रिमाला हे मंजूर नव्हतं. जेव्हा रिमाने करणच्या मांसाहाराचा विरोध केला, तेव्हा त्यानेही प्रेमाखातर मांसाहार सोडण्याचं वचन दिलं. यानंतर रिमाने आपल्या आई- वडिलांना करणबद्दल सांगितलं. सुरुवातीला विरोध करणारे आई, वडिलही मुलीच्या हट्टापुढे झुकले आणि लग्नासाठी तयार झाले. 

 

रिमाने तक्रारीत सांगितलं आहे की, करणने कधी मुलांसाठीही पैसे दिले नाहीत. ऑफिसच्या कामानिमित्र बाहेर जाण्याचं कारण सांगून तो आपल्या मित्रांसोबत पिकनिकला जाऊन दारु प्यायचा आणि मांसाहारही करत असे", असं रिमाने सांगितलं आहे. 

 

"आपण कधीही रिमाच्या समोर बसून मांस खाल्लेलं नाही, किंवा मी कधीच तिला मांसाहार करण्याच्या ठिकाणी घेऊन गेलेलो नाही", अशी बाजू करणने मांडली आहे. "जेव्हा कधी मी शहराबाहेर जात असे तेव्हाच मांसाहार आणि दारुचं सेवन करत असे. आणि त्यादिवशी घरी जाऊ नये असाच प्रयत्न असायचा", असंही करणने सांगितलं आहे. 

 

पोलिसांनी दोघांना आपापसात चर्चा करुन प्रकरण मिटवण्याचा सल्ला दिला. तसंच आपल्या मुलासोबत वेळ घालवण्याचाही उपाय सांगितला. पण रिमा यासाठी तयार नसून आपल्या पतीच्या घरी जाणार नसल्यावर ठाम आहे. अखेर दोघांनी घटस्फोटासाठी अर्ज केला आहे.