लग्न मंडपात नवऱ्याचं गुपित उघड झालं; मैत्रिणींच्या सांगण्यावरुन नवरीनं थेट लग्नच मोडलं

उत्तर प्रदेशातील इटावा येथे ध्यानपूरा गावात रहिवासी महेशनं त्यांच्या मुलीचं लग्न बिधूना गावातील अजय कुमारसोबत निश्चित केले होते.

इटावा – लग्न म्हटलं तर दोन कुटुंब एकत्र येतात. नवरा-बायको आपल्या भावी आयुष्याबद्दल नवनवीन स्वप्न रंगवत असतात. लग्न म्हटलं तर दोन जीवांचं मिलन. नात्यांमधील विश्वास. पण उत्तर प्रदेशात जे घडलं ते पाहून सगळेच हैराण झाले. पती-पत्नीच्या नात्याची सुरुवात होण्याआधीच विश्वासघात झाल्याचं उघड झालं. याठिकाणी नवरदेव वऱ्हाडासोबत लग्न मंडपात आला आणि त्याठिकाणी नवरीला नवऱ्याचं गुपित कळालं अन् लग्न मोडलं.

मिळालेल्या माहितीनुसार, उत्तर प्रदेशातील इटावा येथे ध्यानपूरा गावात रहिवासी महेशनं त्यांच्या मुलीचं लग्न बिधूना गावातील अजय कुमारसोबत निश्चित केले होते. १६ फेब्रुवारी २०२२ रोजी लग्नाच्या आधीच्या सर्व विधी पार पडल्या. दोन्ही कुटुंब आनंदित होतं. त्यानंतर २२ फेब्रुवारीला बिधूनाहून अजय कुमार वऱ्हाडी मंडळींसोबत नवरीच्या गावी पोहचला. नवरदेव थाटामाटात घोड्यावर बसून स्वार होता. बँड बाजा वाजत होता. वऱ्हाडातील हौसी मंडळी नाचत होती.

नवरीच्या दाराजवळ नवऱ्याचं वऱ्हाड पोहचताच कुटुंबीयांना नवरदेवाचं स्वागत केले. त्यानंतर लग्न मंडपात नवरी मुलगी स्टेजवर पोहचली तेव्हा अचानक नवरीच्या मैत्रिणींना नवऱ्याला पाहून काहीतरी संशय आला. कुजबूज सुरु झाली. नवऱ्यानं चेहऱ्याची सर्जरी केली होती त्याचसोबत नवऱ्याचं टक्कल पडलं होतं, त्याच्या डोक्यावर केस नव्हते तर विग लावून तो आला होता. मैत्रिणींनी नवरीला ही गोष्ट निदर्शनास आणून दिलं त्यानंतर लग्न मंडपात गोंधळ उडाला.

वडिलांसोबत नवरी पुन्हा माघारी फिरली

नवरीच्या नवऱ्याचं गुपित कळाल्यानंतर तातडीनं तिने या लग्नास नकार दिला. लग्न अचानक मोडल्यानं सुरुवातीला कुणालाच काही कळेना. तेव्हा नवरा-नवरी यांच्या कुटुंबीयांमध्ये वाद निर्माण झाला. त्यानंतर नवरी तिच्या वडिलांसोबत लग्न मंडपातून माघारी परतली. हा वाद इतका वाढला की मंडपात पोलिसांना बोलावलं लागलं. पोलिसांनी साम्यंजस्याने तोडगा काढण्याचा प्रयत्न केला. परंतु नवरी मुलीनं लग्नास नकार दिल्यानं कुणाचंही काही चाललं नाही. अखेर नवरदेव वऱ्हाडी मंडळीसोबत पुन्हा गावी निघाला. नवऱ्याचं सत्य नातेवाइकांना समजताच त्यांनाही धक्का बसला.