5 वर्षाआधी जिला दिला होता घटस्फोट पुन्हा तिच्यासोबत केलं लग्न, इमोशनल आहे कहाणी

विनय जयस्वालची कहाणीच उलट आहे. या व्यक्तीने आपल्या पत्नीला घटस्फोट दिला आणि 5 वर्षांनी पुन्हा तिच्याचसोबत लग्न केलं.

अनेकदा आयुष्यात अशा काही घटना घडून जातात, ज्यांबाबत पुढे जाऊन असं वाटतं की, मागे जाता आलं असतं आणि बिघडलेल्या गोष्टी जुळवता आल्या असत्या तर...असा विचार अनेकजण करतात, पण असं शक्य नसतं. कारण अशा अनेक गोष्टी असतात ज्या आपल्या या विचारात अडथळा ठरत असतात. 

मात्र, विनय जयस्वालची कहाणीच उलट आहे. या व्यक्तीने आपल्या पत्नीला घटस्फोट दिला आणि 5 वर्षांनी पुन्हा तिच्याचसोबत लग्न केलं. दोघांची पुन्हा एक होण्याची कहाणी फार भावूक करणारी आहे. जी प्रेम करणाऱ्या लोकांसाठी एक उदाहरण आहे.

घटस्फोटाच्या 5 वर्षानंतर पुन्हा लग्न

विनय जयस्वालने त्याच्या सोशल मीडिया प्लॅटफॉर्म फेसबुकवर त्याची कहाणी शेअर केली. त्याने लिहिलं की, 'जर-तर आणि किंतु-परंतुच्या गोष्टी मागे सोडत आम्ही एकमेकांपासून वेगळे झाल्यानंतर पुन्हा एकदा एक होण्याचा निर्णय घेतला. कुटुंबियांच्या उपस्थितीत रितीरिवाजानुसार पुन्हा लग्न केलं. आता आम्ही एक आहोत आणि सोबत आहोत'.

या कपलचं लग्न डिसेंबर 2012 मध्ये झालं होतं. पण काही वादामुळे दोघांनीही सहमतीने 2018 मध्ये घटस्फोट घेतला. विनयने सांगितलं की, घटस्फोटाचा निर्णय आला त्या दिवशी आम्ही खेळीमेळीच्या वातावरणात सोबत डिनर केलं आणि एकमेकांना निरोप दिला. इतक्या वर्षात आमचा संवाद तुटला होता. पण हृदयाचं कनेक्शन तुटलं नव्हतं.

पुन्हा कसे झाले एक?

जेव्हा विनय जयस्वालला हार्ट अटॅक आला तेव्हा त्यांची एक्स वाईफ त्यांच्याकडे धावत आली. तिने विनयच्या ओपन हार्ट सर्जरीनंतर आयसीयूपासून ते घरापर्यंत त्याच्या रिकव्हरी दरम्यान विनयला साथ दिली.

विनयने सांगितलं की, माझ्या हार्ट अटॅकने आम्हा दोघातील अंतर बर्फासारखं वितळवण्याचं काम केलं आणि आम्ही पुन्हा एक झालो. विनयच्या फेसबुक अकाऊंटवरून दिसतं की, तो उत्तर प्रदेशच्या प्रयागराज राहणारा आहे आणि एक पत्रकार आहे.