बोंबला! लग्नात स्टेजवरच रोमॅंटिक झाला नवरदेव, केसं असं काही की नवरीने लग्नास दिला नकार!

नवरीला परिवारातील लोकांनी खूप समजावण्याचा प्रयत्न केला. पण ती काही लग्नास तयार झाली नाही.

लग्नाच्या सीझनमध्ये लग्नासंबंधी अनेक अजब हैराण करणाऱ्या घटना समोर येत असतात. अशीच एक घटना उत्तर प्रदेशच्या संभलमधून समोर आली आहे. इथे एका नवरदेवाला स्टेजवरच रोमॅंटिक होणं महागात पडलं. त्याने असं काही केलं की, नवरीने तिथेच त्याला लग्न करण्यास नकार दिला. नवरीला परिवारातील लोकांनी खूप समजावण्याचा प्रयत्न केला. पण ती काही तयार झाली नाही. त्यानंतर पंचायत बोलवण्यात आली आणि हुंडा परत देऊन नवरदेवाला घरी जावं लागलं.

ऐचोडा कम्बोह भागातील सकतपुर गावात सतुपुरा गावातून 13 मार्चला वरात आली होती. नवरीकडील लोकांनी वरातीचं जल्लोषात स्वागत केलं. रितीरिवाजांना सुरूवात झाली आणि नवरी-नवरदेव स्टेजवर पोहोचले. वराती जेवण करण्यात आणि डीजेवर नाचण्यात व्यस्त होते. हार घालण्याच्या रिवाजाला सुरूवात झाली. 

यादरम्यान नवरदेवाने अचानक नवरीला उचललं. अचानक झालेल्या या घटनेमुळे नवरी स्टेजवरच संतापली. नवरीकडील लोकांनीही नवरदेवाच्या या वागण्याचा विरोध केला. यावर नवरी इतकी संतापली की, स्टेजवरून निघून गेली. नवरदेव तिला बघतच राहिला.

त्यानंतर नवरीची समजूत काढण्यासाठी घरातील लोक तिच्याजवळ गेले. पण नवरीने लग्न करण्यास नकार दिला. रात्री उशीरापर्यंत तिची समजूत काढण्याचा प्रयत्न झाला. पण तिने कुणाचं ऐकलं नाही. अशात दोन्हीकडील लोकांमध्ये थोडा वाद झाला.

घटनेची माहिती पोलिसांना देण्यात आली. पोलिसांनी दोन्हीकडील लोकांना बोलवून चर्चा केली. पण नवरी लग्नास तयार झाली नाही. अशात नवरदेवाकडील लोकांना हुंडा परत देण्याची मागणी झाली. जेव्हा सगळ्या वस्तू परत देण्यात आल्या तेव्हा नवरीने नवरदेव आणि त्याच्या पाहुण्यांना जाऊ दिलं.