Wife Marriage by Husband: पत्नीच्या हट्टापुढे इरेला पेटला पती; लग्न लावण्यासाठी गेला कोर्टात, पण प्रियकराने...

Wife Marriage by Husband: पत्नीचे तिच्या प्रियकराशी लग्न लावून देण्यासाठी पती आकाश पाताळ एक करत आहे. यासाठी त्याने आधी आपल्या कुटुंबीयांची मनधरणी केली आहे.

हमीरपूर : उत्तर प्रदेशच्या हमीरपूर जिल्ह्यात सध्या एक प्रकरण चांगलेच गाजत आहे. निवडणूकीमुळे वातावरण तापलेले असले तरी या प्रकरणाची चवीने चर्चा होत आहे. नववधूने पतीकडे प्रियकराशी लग्न लावून देण्याचा हट्ट धरला आहे. यामुळे पतीनेही तिची इच्छा पूर्ण करण्याचा चंग धरला आहे. यासाठी त्याने न्यायालयात धाव घेतली आहे. 

पत्नीचे तिच्या प्रियकराशी लग्न लावून देण्यासाठी पती आकाश पाताळ एक करत आहे. यासाठी त्याने आधी आपल्या कुटुंबीयांची मनधरणी केली आहे. त्यात एकेकाला समजावताना त्याला नाकीनऊ आले आहेत. असे असताना आता त्याने तातडीने घटस्फोट मिळविण्यासाठी न्यायालयात धाव घेतली आहे. परंतू इथेही त्याला संघर्षच करावा लागत आहे.

 न्यायालयाने त्याला लगेचच घटस्फोट देण्यास नकार दिला आहे. यामुळे त्याने नोटरी बनवून पत्नीला प्रियकरासोबत राहण्यासाठी संमती दिली आहे. मात्र, एवढे सगळे करून देखील प्रियकराने कच खाल्ली आणि लग्न करण्यापासून मागे हटला आहे. आता त्याला आणि त्याच्या कुटुंबीयांना समजविण्याचे प्रयत्न त्याला करावे लागणार आहेत. 

झाले असे की, महोबा जिल्हायातील एका तरुणाचे गेल्या मे महिन्यात हमीरपूर जिल्ह्यातील तरुणीशी लग्न झाले होते. लग्नानंतर काही दिवसांत पतीला पत्नीचे प्रेमसंबंध असल्याचे समजले होते. तिनेही ते मान्य केले आणि प्रियकराशी लग्न लावून देण्याचा हट्ट धरला. यावर त्या तरुणाने आपल्या घरच्यांना याबाबत समजावले आणि त्या दोघांचे लग्न लावून देण्याचा निर्णय घेतला. त्यानंतर या तरुणाने पत्नी आणि तिच्या प्रियकराला घेऊन हमीरपूर गाठले. घटस्फोटासाठी अर्ज केला, परंतू लगेचच तो होत नसल्याने अखेर त्याने पत्नीपासून वेगळे राहण्यासाठी नोटरी केली.