१६ वर्षीय मुलीची गळफास घेऊन आत्महत्या

या घटनेची नोंद रामनगर पोलीस ठाण्यात करण्यात आली आहे.

लोकमत न्यूज नेटवर्क

डोंबिवली: दहावीतील विद्यार्थीनीने रहात्या घरात गळफास घेऊन आत्महत्या केल्याची घटना ताजी असतानाच बुधवारी भाऊबीजेच्या दिवशी ज्योती ठाकुर या १६ वर्षीय मुलीने रहात्या घरात गळफास घेऊन आत्महत्या केल्याची घटना पुर्वेकडील तुकारामनगरमध्ये घडली. ज्योतीने आत्महत्या का केली याचे कारण समजू शकलेले नाही.

ओमप्रकाश ठाकूर हे आयरेरोड, तुकारामनगरमधील रतन भगत चाळीत पत्नी, तीन मुली आणि एका मुलासह राहतात. ओमप्रकाश यांचा कपडे विक्रीचा व्यवसाय आहे. ते बुधवारी रात्री पत्नी आणि मुलासह दुकानावर गेले होते. त्यांच्या मुली घरीच होत्या. मुलगी खुशबु आणि राणी या घराबाहेर खेळण्यासाठी गेल्या होत्या. ज्योती घरामध्ये एकटीच होती. खुशबु आणि राणी खेळून घरी आल्या तेव्हा दरवाजा आतुन बंद होता. त्यावेळी राणीने दाराच्या फटीतून आतमध्ये हात घालीत आतील कडी उघडून घरात प्रवेश केला. त्यावेळी खुशबु आणि राणीला ज्योती किचनमधील सीलींग फॅनला ओढणीने गळफास घेतलेल्या अवस्थेत दिसून आली. 

दोघींनी तत्काळ याची माहीती वडीलांना दिली. ओमप्रकाश यांनी पत्नीसह घराकडे धाव घेतली. ओढणीने गळफास घेतलेल्या अवस्थेत असलेल्या ज्योतीला आजुबाजुच्या लोकांच्या मदतीने खाली घेतले आणि तीला लागलीच केडीएमसीच्या शास्त्रीनगर रूग्णालयात उपचारार्थ नेण्यात आले. परंतू तेथील डॉक्टरांनी तपासून तीला मृत घोषित केले. या घटनेची नोंद रामनगर पोलीस ठाण्यात करण्यात आली आहे.