भटक्या श्वानाला डोक्यात दगड घालून ठार मारले!

पिसवलीतील धक्कादायक घटना.

डोंबिवली: भटक्या श्वानाच्या डोक्यात दगड घालून त्याला ठार मारल्याची धक्कादायक घटना मानपाडा हद्दीतील पिसवली परिसरात घडली. श्वानाला निर्दयीपणे मारणा-या ओम प्रकाश सिंग याच्या विरोधात मानपाडा पोलीस ठाण्यात गुन्हा दाखल झाला आहे. 

मलंग रोड पिसवली लगतच्या ५०-५० ढाब्या नजीक असलेल्या नाल्याजवळ बसलेल्या एका मादी जातीच्या भटक्या श्वानाच्या डोक्यात ओमप्रकाशने दोन दगड घालत तीला गंभीर जखमी केले. दगडं डोक्यात घातल्याने श्वान वेदनेने विव्हळत होती. ही संपूर्ण घटना मोबाईल कॅमेरात कैद झाली असून हा व्हिडिओ सोशल मीडियावर व्हायरल झाला आहे. यात ओम प्रकाशला आजूबाजूचे नागरिक हे कृत्य करण्यापासून रोखण्याचा प्रयत्न करत होते. मात्र कोणाचेही न ऐकता ओमप्रकाशने मोठे दगड या श्वानाच्या डोक्यात घालून त्याला गंभीर जखमी केले. 

प्राणी मित्रांनी या जखमी श्वानाला उपचारासाठी रुग्णालयात नेले. मात्र  श्वानाचा उपचारादरम्यान मृत्यू झाला. ही घटना शनिवारी संध्याकाळी घडली. या घटनेची माहिती सोमवारी कळताच याप्रकरणी अलाईज फॉर ॲनिमल फाउंडेशनच्या सोनाली वाघमारे यांनी तात्काळ मानपाडा पोलीस ठाण्यात धाव घेत श्वानाला निर्दयीपणे मारणा-या ओमप्रकाश विरोधात तक्रार दिली. पोलिसांनी गुन्हा दाखल करत पुढील तपास सुरू केला आहे.