बदलापूर रेल्वे स्थानकात गोळीबाराची घटना; मित्रानेच केला मित्रावर पैशाच्या वादातून गोळीबार

पैशाच्या वादातूनच मित्राने मित्रावर गोळी चालवण्याचे पोलीस प्रशासनामार्फत सांगण्यात आले.

पंकज पाटील, बदलापूर :बदलापूर रेल्वे स्थानकात गोळीबार झाल्याची खळबळजनक घटना आज सायंकाळी ६ वाजताच्या सुमारास घडली. या गोळीबारात एका तरुणाच्या पायाला गोळी लागल्याचेही समोर आले आहे. पैशाच्या वादातूनच मित्राने मित्रावर गोळी चालवण्याचे पोलीस प्रशासनामार्फत सांगण्यात आले.  

बदलापूर रेल्वे स्थानकाच्या बाहेर मुख्य बाजारपेठेत सायंकाळच्या सुमारास चार मित्रांमध्ये पैशांच्या देवाण-घेवाणीवरून वाद झाले. या वादानंतर हे चौघे रेल्वे स्थानक परिसरात आले असता पुन्हा त्यांच्याच वादावादी सुरू झाली. यापैकी शंकर संसारे नामक तरुणाने त्याचाच मित्र असलेल्या विकास पगारे याच्यावर गोळीबार केला. तब्बल तीन राऊंड रेल्वे स्थानकात फायर करण्यात आले त्यापैकी एक गोळी पगारे याच्या पायाला लागली. गोळीबार करून आरोपी संसारे हा रेल्वे रुळावरून पळत जात असताना पोलिसांनी त्याला पाठलाग करून पकडले. तर दुसरीकडे जखमी असलेला पगारे हा परस्पर रुग्णालयात उपचारासाठी दाखल झाला आहे. 

- सायंकाळी सहा वाजता च्या दरम्यान बदलापूरच्या होम प्लॅटफॉर्मवर ही गोळीबाराची घटना घडली त्यानंतर आरोपी पळून जाण्यासाठी रेल्वे रुळावर उडी मारत असताना त्याचा पाय घसरला आणि त्यात तो खाली कोसळला. त्यात त्याच्या हाताला दुखापत झाली अशा परिस्थितीतही तो रेल्वे रुळावरून पळून जाण्याचा प्रयत्न करत होता.

- या गोळीबारात जो पगारे नामक तरुण जखमी झाला आहे त्याच्या हातात देखील बंदूक दिसत असल्यामुळे नेमकी ही बंदूक त्याच्याकडे आली कुठून असाही प्रश्न आता उपस्थित होऊ लागला आहे. 

- पगारे हा जखमी झाल्यानंतर देखील आरोपी संसारे याला गाठण्याचा प्रयत्न करीत होता मात्र दुसऱ्या मित्राने त्याला तिथून बाहेर काढल्यामुळे पुढचा अनर्थ टळला.

- ज्यावेळेस गोळीबाराची घटना घडली त्यावेळेस आजूबाजूला मोठ्या प्रमाणात प्रवाशांची वर्दळ सुरू होती. मात्र फायरिंगचा आवाज येताच प्रवाशांनी तिथून काहीसा पळ काढला. 

- फायरिंग करून पळणारा आरोपी याला पोलिसांनी पाठलाग करून रेल्वे रुळातच गाठल्यानंतर काही रेल्वे प्रवाशांनी देखील या आरोपीला पकडण्यासाठी प्रयत्न केले आणि त्यामुळे पोलिसांना देखील प्रवाशांची मदत झाली.