मुख्यमंत्री एकनाथ शिंदे आणि शरद पवार आज कल्याण दौऱ्यावर

उल्हासनगरमध्ये पार पडणाऱ्या एल्गार परिषदेला उपस्थित राहण्यासाठी पवार येत आहेत.

कल्याण, उल्हासनगर : मुख्यमंत्री एकनाथ शिंदे उद्या, सोमवारी कल्याण डोंबिवली महापालिका क्षेत्रातील विविध विकास प्रकल्पांच्या उद्घाटनासाठी कल्याणमध्ये येत आहेत तर राष्ट्रवादी काँग्रेसचे (शरद पवार गट) अध्यक्ष शरद पवार हे उल्हासनगर येथील एल्गार परिषदेसाठी येत आहेत. तत्पूर्वी त्यांची कल्याणमधील प्रमुख पदाधिकाऱ्यांबरोबर बैठक पार पडणार आहे. 

कल्याण डोंबिवली महापालिकेच्या सिटी पार्क योगीधाम, दिलीप कपोते वाहनतळ, बीएसयूपी उंबर्डे येथील घरांचे वाटप, अग्निशमन दल कार्यालयाचे उद्घाटन या कार्यक्रमांसाठी मुख्यमंत्री शिंदे सोमवारी संध्याकाळी पाच वाजता कल्याणमध्ये येत आहेत. त्याच दरम्यान पवार हे देखील कल्याणमध्ये येत आहेत. 

उल्हासनगरमध्ये पार पडणाऱ्या एल्गार परिषदेला उपस्थित राहण्यासाठी पवार येत आहेत. कार्यक्रम उल्हासनगरला असला तरी संध्याकाळी चार वाजून २० मिनिटांनी कल्याण बिर्ला स्कूल येथील पटांगणावर पवार यांचे हॅलिकॉप्टरने आगमन होणार आहे. साडेचार वाजता कल्याण पश्चिमेकडील खडकपाडा स्प्रिंग टाइम क्लबमध्ये पवारांची पक्षाच्या प्रमुख पदाधिकाऱ्यांबरोबर बैठक होणार आहे. तेथून संध्याकाळी सव्वापाचच्या सुमारास पवार हे उल्हासनगरला रवाना होणार आहेत. सहा वाजता दसरा मैदानावर होणाऱ्या एल्गार परिषदेला ते उपस्थित राहणार आहेत.