कल्याण ग्रामीणमध्ये मनसेला खिंडार; शेकडो मनसैनिकांचा शिवसेनेत प्रवेश

मनसे पक्षातील शेकडो पदाधिका-यांनी रविवारी खासदार डॉ श्रीकांत शिंदे यांच्या प्रमुख उपस्थितीत शिवसेना पक्षात प्रवेश केला.

डोंबिवली : कल्याण ग्रामीण भागातील मनसे पक्षातील शेकडो कार्यकर्ते आणि पदाधिका-यांनी रविवारी खासदार डॉ श्रीकांत शिंदे यांच्या प्रमुख उपस्थितीत शिवसेना पक्षात प्रवेश केला. मनसेच्या स्थापनेपासून कार्यरत असलेले अॅड सुहास तेलंग, ओम लोके, शीतल लोके, चंद्रकांत सावंत या प्रमुख पदाधिका-यांसह उपशहर अध्यक्ष, महिला शाखा अध्यक्ष, उपशाखा अध्यक्ष आणि अन्य मनसैनिकांचा प्रवेश करणा-यांमध्ये समावेश आहे. 

अंतर्गत कुरघोड्या, चुकीच्या लोकांची पदावर नियुक्ती आणि सामान्य नागरिकांच्या समस्या सोडविण्यासाठी रस्त्यावर उतरणा-या पदाधिकारी आणि मनसैनिकांवर अन्याय अशा वातावरणामुळे मनसे पक्षाला सोडचिठ्ठी दिल्याची भावना संबंधितांकडून व्यक्त करण्यात आली. तर मुख्यमंत्री एकनाथ शिंदे यांच्या प्रेमापोटी दरदिवशी मोठया संख्येने अन्य पक्षातून कार्यकर्ते, पदाधिकारी शिवसेनेत प्रवेश करीत आहेत. 

कल्याण लोकसभेतील शिवसेनेच्या विकास कामांचा धडाका पाहून अन्य पक्षातील कार्यकर्ते पदाधिकारी प्रभावित होऊन प्रवेश करीत आहेत. यापुढेही हा प्रवेशाचा सिलसिला कायम राहिल यात शंका नाही असे खासदार शिंदे यावेळी म्हणाले. दरम्यान, गेले काही दिवसांपुर्वी मनसे आणि शिवसेनेत विकास कामांच्या मुदयावरून व्टीटरवाद उफाळला होता. पण आता मनसेचे आमदार राजू पाटील यांच्या कल्याण ग्रामीण मतदारसंघातील मनसेला खिंडार पाडून खासदार शिंदे यांनी पाटील यांना शह दिल्याची चर्चा आहे.