थुंकी अंगावर उडाली, जाब विचारणा-याची हत्या; आरोपीला अटक

अंगावर थुंकी उडाल्याचा जाब विचारला म्हणून केलेल्या मारहाणीत विजय पटवा या ५२ वर्षीय व्यक्तीचा मृत्यू झाल्याची घटना शनिवारी दुपारी दोन च्या सुमारास घडली.

डोंबिवली:  

अंगावर थुंकी उडाल्याचा जाब विचारला म्हणून केलेल्या मारहाणीत विजय पटवा या ५२ वर्षीय व्यक्तीचा मृत्यू झाल्याची घटना शनिवारी दुपारी दोन च्या सुमारास घडली. याप्रकरणी विष्णुनगर पोलिसांनी कैफ खान या १९ वर्षीय तरूणाला अटक केली असून त्याला रविवारी कल्याण जिल्हा सत्र न्यायालयाने दोन दिवसांची पोलिस कोठडी सुनावली आहे. दरम्यान ही मारहाणीची घटना सीसीटिव्ही कॅमेरात कैद झाली आहे.

डोंबिवली पश्चिमेकडील नवापाडा परिसरात राहणारे पटवा हे दुचाकीवरून दुपारच्या सुमारास चिंचोडयाचा पाडा परिसरातून जात होते. त्याच वेळेस रस्त्यावरून पायी चालत जात असलेला कैफ हा रस्त्यावर थुंकला. या दरम्यान मागून दुचाकीने येणा-या पटवा यांच्या अंगावर थुंकी उडाली. थुंकी अंगावर उडाल्याचा जाब पटवा यांनी कैफला विचारला. याचा राग कैफ ला आला आणि त्याने पटवा यांना शिवीगाळ करीत हुज्जत घालण्यास सुरु वात केली. त्यामुळे पटवा देखील संतापले. दोघांमध्ये सुरू झालेल्या वादाचे रूपांतर हाणामारीत झाले. संतापलेल्या कैफ ने पटवा यांना लाथांनी ठोशाबुक्क्यांनी बेदम मारहाण केली. यात पटवा हे रस्त्यावर खाली कोसळले यात त्यांच्या डोक्याला गंभीर दुखापत झाली आणि ते जागेवरच बेशुध्द पडले. त्यांना आजूबाजूच्या नागरिकांनी तत्काळ केडीएमसीच्या शास्त्रीनगर रुग्णालयात दाखल केले मात्र तत्पूर्वीच त्यांचा डोक्याला मार लागून मृत्यू झाल्याचे निदान डॉक्टरानी केले. किरकोळ कारणावरून झालेल्या वादातून हत्या झाल्याने शहरात एकच खळबळ उडाली आहे.