जिल्हा परिषद शाळेतील विद्यार्थ्यांसाठी बांधले शौचालय

अचिव्हर्स कॉलेजचे विद्यार्थ्यांच्या सेवेसाठी सामाजिक उपक्रम.

सचिन सागरे, कल्याण, लोकमत न्यूज नेटवर्क

कल्याण : अचिव्हर्स कॉलेज ऑफ कॉमर्स अँड मॅनेजमेंट, कल्याणने चौरे गावातील जिल्हा परिषद शाळेतील विद्यार्थ्यांसाठी शौचालये बांधून एक महत्त्वपूर्ण उपक्रम हाती घेतला आहे. यापूर्वी या शाळेत विद्यार्थ्यांसाठी शौचालयांची कोणतीही सोय नव्हती. या उपक्रमामुळे विद्यार्थ्यांना स्वच्छतेची सोय उपलब्ध झाली आहे.

तसेच, कॉलेजने स्टेशनरी आणि वह्या वाटप अभियानाचे आयोजन केले होते. ज्यात शाळेच्या विद्यार्थ्यांना त्यांच्या शैक्षणिक वर्षात आवश्यक असलेले सर्व शैक्षणिक साहित्य वितरित करण्यात आले. हा उपक्रम चौरे गाव, माणिवली, संतेचा पाडा, लोणावळा, बदलापूर आणि हिमाचल प्रदेश येथील जिल्हा परिषद शाळांमध्ये आयोजित करण्यात आला होता.

प्रत्येक वर्षी अशा प्रकारच्या स्टेशनरी आणि वह्या वाटपाचा उपक्रम आयोजित करणे ही कॉलेजची परंपरा आहे. मागील वर्षी २५० विद्यार्थ्यांना या उपक्रमाचा लाभ झाला होता आणि यावर्षी हा आकडा चारशे विद्यार्थ्यांपर्यंत पोहोचला आहे. या उपक्रमाचे मार्गदर्शन अचिव्हर्स कॉलेजचे अध्यक्ष आणि प्राचार्य डॉ. महेश भिवंडीकर आणि विश्वस्त सीए गौरांग भिवंडीकर यांच्या नेतृत्वाखाली करण्यात आले.

या उपक्रमाचे आयोजन कॉलेजच्या एनएसएस युनिटद्वारे करण्यात आले असून, एनएसएस कार्यक्रम अधिकारी राजेशकुमार यादव आणि नेहा त्रिपाठी यांनी महत्त्वाची भूमिका बजावली आहे. या सर्व सामाजिक कार्यामध्ये जैनुद्दीन सुतरवाला, अॅड. मुस्तफा शमिम, सीए लीना भिवंडीकर, सीए कौशिक गडा आणि इतरांचे सहकार्य लाभले.

या उपक्रमामुळे विद्यार्थ्यांना त्यांच्या शैक्षणिक गरजा पूर्ण करण्यात मदत होणार आहे. अचिव्हर्स कॉलेजच्या या सामाजिक कार्यामुळे विद्यार्थ्यांच्या शैक्षणिक प्रवासात सकारात्मक बदल घडून येईल. यामुळे विद्यार्थ्यांना शिक्षणात पुढे जाण्यासाठी प्रोत्साहन मिळेल आणि त्यांच्या शैक्षणिक यशात वाढ होईल असा विश्वास प्राचार्य डॉ. भिवंडीकर यांनी व्यक्त केला.