गडहिंग्लज येथील आगीत १० लाखांचे नुकसान

गडहिंग्लज : शहरातील वडरगे रोडवरील लक्ष्मण आण्णाप्पा बंबलाडे यांच्या घराला आग लागून सुमारे १० लाखांचे नुकसान झाले. रविवारी (दि. १३) पहाटे चारच्या सुमारास ही घटना घडली. आगीचे नेमके कारण समजू शकले नाही.

बंबलाडे यांचा अगरबत्ती आणि विद्युत साहित्य विक्रीचा व्यवसाय आहे. त्यामुळे घरात अगरबत्ती, विद्युत साहित्य तसेच औषध दुकानाचे साहित्य ठेवले होते. पहाटे अचानक लागलेल्या आगीमुळे लाकडीसाठ्याने पेट घेतला व तो खाली कोसळला. त्यामुळे घरातील संगणक, फर्निचर, शेतीची अवजारे, फ्रिज व इतर सर्व साहित्य आगीच्या भक्ष्यस्थानी पडले.

पेट घेतलेल्या घरात कोणीही राहत नसल्याने सुदैवाने जीवितहानी टळली. फिरायला जाणाऱ्या लोकांनी घर पेटल्याचे पाटील आणि बंबलाडे यांना कळविले. त्यावेळी बंबलाडे यांनी घटनास्थळी धाव घेऊन अग्निशमन दलाला पाचारण केले.

पालिकेच्या आपत्ती व्यवस्थापन विभागाकडील अग्निशमन दलाने तातडीने जाऊन आग आटोक्यात आणली.

------------------------

फोटो ओळी : गडहिंग्लज शहरातील वडरगे रोडवरील लक्ष्मण बंबलाडे यांच्या घराला आग लागून झालेले नुकसान.

क्रमांक : १३१२२०२०-गड-०७