१० हजाराची देशी -विदेशी दारू केली जप्त

हातकणंगले : रुकडी (ता. हातकणंगले) येथे चार देशी -विदेशी दारू अड्डयांवर उपविभागीय पोलीस अधिकारी रामेश्वर वेंजने यांनी छापा टाकून १० हजार रुपयांची दारू जप्त करून चौघा संशयितांना ताब्यात घेतले आहे. या छापेमारीचा गुन्हा हातकणंगले पोलीस ठाण्यामध्ये दाखल झाला आहे.

रुकडी गावचा उरूस चार दिवसांवर येऊन ठेपला आहे. कोरोना संकटामुळे यावर्षी ग्रामपंचायतीने उरूस रद्द केला आहे. मात्र, उरसामध्ये गर्दी होणार म्हणून गावामध्ये देशी -विदेशी दारूचा साठा करण्यात आल्याची माहिती खबऱ्यामार्फत डीवायएसपी रामेश्वर वेंजने यांना मिळाली होती. त्यानुसार बुधवारी दु. ४ वा. पोलीस फौजफाट्यासह ते रुकडो येथे पोहोचले. प्रथम बागडी गल्लीमध्ये असलेल्या शीतल बागडी यांच्या घरी धाड टाकून देशी -विदेशी २ हजार ९३४ रुपयांची दारू जप्त केली. यानंतर गणेश बागडी याच्या घरी २ हजार ३४२ रुपयांची, तर चंद्रकांत बागडी यांच्या घरी ३ हजार ८७८ आणि रवींद्र भोसले यांच्या घरी १ हजार ३२२ रुपयाची देशी -विदेशी दारू जप्त केली.