घराची कौले काढून शाहूपुरीत १७ हजारांची घरफोडी

कोल्हापूर : येथील शाहूपुरीतील घोरपडे गल्लीत बंद घराची कौले काढून अज्ञात चोरट्याने १७ हजारांची घरफोडी केली. चोरट्याने सोन्या-चांदीच्या दागिन्यांवर हात मारला. ही घटना बुधवारी पहाटेच्या सुमारास घडली. याबाबत श्रीधर प्रकाश इंगवले (रा. ३८२/ख ई वॉर्ड, घोरपडे गल्ली, चव्हाण पॅसेज) यांनी शाहुपूरी पोलीस ठाण्यात चोरीची तक्रार दिली.

पोलिसांनी दिलेली माहिती अशी की, श्रीधर इंगवले हे खासगी कंपनीत अभियंता म्हणून नोकरीस आहेत. त्यांचा मुलगा रुग्णालयात ॲडमिट आहे. त्यासाठी इंगवले दांपत्य हे मंगळवारी रात्री हॉस्पिटलमध्येच थांबले होते. त्यावेळी घरी कोणी नसल्याची संधी साधून अज्ञात चोरट्याने त्यांच्या बंद घराची कौले काढून आत प्रवेश केला. आतील रोख रकमेसह सोन्याच्या दोन वाट्या, कानातील डूल, चांदीचे कडे, चांदीचे ब्रेसलेट आदी सुमारे १६ हजार ९०० रुपयेचा ऐवज चोरट्याने लंपास केला. इंगवले हे बुधवारी सकाळी रुग्णालयातून घरी परतल्यानंतर हा चोरी झाल्याचा प्रकार उघडकिस आला. दरम्यान, चोरीची माहिती मिळताच सहा. पो. नि. परशुराम कोरडे यांनी घटनास्थळी भेट दिली. तसेच डॉगस्कॉटने चोरट्याचा माग काढण्याचा प्रयत्न केला. याबाबत शाहुपूरी पोलीस ठाण्यात गुन्हा नोंद झाला आहे.