उंदरवाडी फाट्याजवळ अपघातात २ जणांचा मृत्यू; तर दोघं जखमी 

दरम्यान जखमीपैकी छाया तानाजी पाटील आणि अन्वीता कांबळे  यांचा उपचारादरम्यान मृत्यू झाला.

बोरवडे  : मुधाळ तिट्टा ते सरवडे या राज्यमार्गावरील उंदरवाडी (ता.कागल) येथील फाट्याजवळ चालकाचा ताबा सुटल्याने चारचाकीने दोन मोटरसायकलना धडक दिली.यामध्ये एका महिलेसह चार वर्षाच्या मुलीचा मृत्यू झाला.तर अन्य दोघेजण गंभीर जखमी आहेत. त्यातील एकजण अत्यावस्थ आहे.छाया तानाजी पाटील(रा.नाधवडे,ता.भुदरगड वय अंदाजे ४५) आणि अन्वीता प्रकाश कांबळे (वय ४)अशी मृतांची नावे आहेत.आज दुपारी चार वाजण्याच्या सुमारास हा अपघात झाला .

याबाबत घटनास्थळावरुन समजलेली माहिती अशी त्रिलोक महादेव तांबे ( वय ४३, मूळ रा. कणेरी ता.करवीर , सध्या रा. कागल ) हे चारचाकी ( क्र. एमएच ०६ ए डब्ल्यू ६६०२ ) सरवडेकडून मुधाळ तिट्टयाकडे चालले होते. सरवडे - उंदरवाडी दरम्यान असलेल्या ओढ्यानजिक चालकाचा ताबा सुटल्याने मुधाळ तिटट्याकडून सरवडेकडे चाललेल्या दोन मोटरसायकलना गाडीने जोराची धडक दिली. 

या धडकेत पॅशन ( क्र. एमएच ०९ सीएन ५४१९ ) गाडीवरील नाधवडे ( ता. भुदरगड ) येथील जयवंत गणपती पाटील ( वय २५ ) व त्यांच्या चुलती छाया तानाजी पाटील ( वय ४५ ) हे गंभीर जखमी झाले. तर स्प्लेंडर ( क्र. एमएच ०९ एजे ४७६२ ) गाडीवरील आटेगाव ( ता. राधानगरी ) येथील प्रकाश शिवाजी कांबळे व त्यांची मुलगी अन्वीता ( वय ४ वर्षे ) हे जखमी झाले.  जखमींना रुग्णवाहिकेतून  उपचारासाठी कोल्हापुरातील सीपीआर दवाखान्यात नेण्यात आले.

दरम्यान जखमीपैकी छाया तानाजी पाटील आणि अन्वीता कांबळे  यांचा उपचारादरम्यान मृत्यू झाला. मुख्य रस्त्यावर अपघात झाल्याने घटनास्थळी नागरिकांनी मोठी गर्दी केली होती. घटनास्थळाचा पंचनामा मुरगूड पोलिसांनी केला. रात्री उशिरापर्यंत गुन्हा नोंदविण्याचे काम सुरु होते. अधिक तपास मुरगूड पोलिस करत आहेत .