चित्रीसह सर्वच प्रकल्पांत ७० टक्के पाणी

आजरा : आजरा तालुक्यातील पाणी प्रकल्पांमध्ये समाधानकारक पाणीसाठा आहे. चित्री, एरंडोळ, खानापूर, धनगरवाडी धरणात सरासरी ७० टक्के पाणी शिल्लक आहे. चित्री प्रकल्पातून १२ मार्चपासून पाण्याचे दुसरे आवर्तन सुरू आहे. शिल्लक पाणीसाठा व वेळेवर आवर्तन सुरू असल्याने चालूवर्षी पाणीटंचाई भासणार नाही.

आजरा व गडहिंग्लज तालुक्याला वरदान ठरलेला चित्री प्रकल्प चालूवर्षी तुडुंब भरला आहे. चित्री प्रकल्पामुळे आजऱ्यातील ६१४, तर गडहिंग्लजमधील ८१३६ एकर क्षेत्र ओलिताखाली आले आहे. चित्रीसह, एरंडोळ, धनगरवाडी, खानापूर प्रकल्पांमुळे १३ हजार ८५ हेक्टर क्षेत्राला लाभ झाला आहे. चित्रीमुळे अनेक गावांच्या पिण्याच्या पाण्याच्या योजना हिरण्यकेशी नदीवरून झाल्या आहेत. त्यामुळे गेल्या १० ते १२ वर्षांत पाणीटंचाईच्या झळा कमी बसत आहेत.

चित्री प्रकल्पात १८८८ पैकी १२६६ द.ल.घ.फू. म्हणजे ६७ टक्के, एरंडोळमध्ये ८२ टक्के, खानापूर ७८ टक्के, तर धनगरवाडी ७३ टक्के पाणीसाठा शिल्लक आहे. एप्रिल व मे महिन्यात मोठ्या प्रमाणात पाण्याची गरज असते. जूनमध्ये पावसाला सुरुवात होते. चालूवर्षी पाऊस डिसेंबरअखेर सुरू होता, तर वळवाचा पाऊस, जानेवारी, फेब्रुवारी व मार्चमध्येही झाला आहे. याचा लाभ पिकांना मिळाला आहे. सर्वच धरणांतून समाधानकारक पाणीसाठा असल्याने शेतकरी वर्गातून समाधान व्यक्त होत आहे.

---------------------------------------

दररोज २ मेगावॅट विजेची निर्मिती

चित्रीच्या पाण्यावर वीजनिर्मिती सुरू

चित्री धरणाच्या गेटमधून सोडल्या जाणाऱ्या पाण्यावर दररोज २ मेगावॅट विजेची निर्मिती सुरू आहे. १२ मार्चपासून चालू वर्षातील दुसऱ्यांदा पाणी सोडले जात आहे. गडहिंग्लज तालुक्यातील खणदाळपर्यंत चित्रीचे लाभक्षेत्र असले तरी पिण्याच्या पाण्यासाठी गोटूर बंधाऱ्यापर्यंत पाणी सोडले जाते.

---------------------------------------

* फोटो ओळी : चित्री प्रकल्पात ६७ टक्के पाणी असताना दिसणारे विहंगम दृश्य.

क्रमांक : २१०३२०२१-गड-०४