संक्षिप्त... क्राईम

कोल्हापूर : ट्रकच्या मागील चाकाखाली सापडून तरुण गंभीर जखमी झाल्याची घटना रविवारी मध्यरात्री घडली. गंगाधर मल्लाप्पा जाधव (वय २८, रा. गोळीबार मैदान, कसबा बावडा) असे जखमीचे नाव आहे. गोव्याकडे जाणाऱ्या ट्रकला थांबवून त्याच्याकडे गंगाधर याने लिप्ट मागितली, त्यावेळी हळू धावणाऱ्या ट्रकमध्ये चढत असताना त्याचा हात सुटून तो जमिनीवर पडला, त्यावेळी त्याच्या पायावरून चाक गेल्याने तो जखमी झाला. त्याला उपचारासाठी सीपीआर रुग्णालयात दाखल केले आहे.

अपघातात दोघे जखमी

कोल्हापूर : कोल्हापूर ते गगनबावडा मार्गावर बालिंगा (ता. करवीर) येथे ओढ्यानजीक रस्ते अपघातात मल्लाप्पा बंडाप्पा बिरादर (वय ५०), वीरेश बसाप्पा कमदगी (वय २९, दोघेही रा. बालिंगा) हे जखमी झाले. दुचाकी घसरल्याने हा अपघात घडला. त्यांच्यावर सीपीआर रुग्णालयात उपचार सुरू आहेत. ही घटना रविवारी रात्री उशिरा घडली.

मारामारीत दोन महिला जखमी

कोल्हापूर : कळंबा ग्रामपंचायतीसमोर झालेल्या मारहाणीत दोन महिला जखमी झाल्या. रूपा दशरथ काळे (वय ५०, रा. जमखेडी, ता. बागलकोट), साऊबाई मारुती गवळी (वय ७८, रा. कुरुंदवाड, ता. शिरोळ) अशी जखमींची नावे आहेत. त्यांना उपचारासाठी सीपीआर रुग्णालयात दाखल केले आहे.