शिवाजी पुलावरून उडी मारणाऱ्यास रोखले नोकरी नसल्याच्या नैराश्येतून कृत्य; घटनेने पोलिसांची तारांबळ,

राज्यभर मराठा समाजाच्या आरक्षण मागणीसाठी ‘बंद’ आंदोलन सुरू असताना गुरुवारी दुपारी शिवाजी पुलावरून पंचगंगा नदीपात्रात उडी मारण्याचा प्रयत्न करणाºया तरुणाला मराठा

कोल्हापूर / पोर्ले तर्फ ठाणे : राज्यभर मराठा समाजाच्या आरक्षण मागणीसाठी ‘बंद’ आंदोलन सुरू असताना गुरुवारी दुपारी शिवाजी पुलावरून पंचगंगा नदीपात्रात उडी मारण्याचा प्रयत्न करणाºया तरुणाला मराठा मावळ्यांनी रोखले. नवनाथ जयसिंग कारंडे (वय ३४, रा. जरगनगर, कोल्हापूर) असे त्याचे नाव आहे. नोकरी नसल्याच्या नैराश्येतून आपण हा निर्णय घेतल्याचे त्याने पोलिसांना सांगितले. पोलीस अधीक्षक
डॉ. अभिनव देशमुख यांनी त्याला धीर देऊन मनपरिवर्तन करण्याचा प्रयत्न केला. या घटनेने पोलिसांची तारांबळ उडाली. त्यानंतर शिवाजी पुलावरील बंदोबस्तात वाढ करण्यात आली.

सकल मराठा समाजातर्फे आयोजित केलेल्या सभेला मराठा कार्यकर्ते उपस्थित राहिले होते. सभा संपल्यानंतर दुपारी दोनच्या सुमारास पन्हाळा, शाहूवाडी आणि करवीरच्या पश्चिम भागातील मराठा कार्यकर्ते शिवाजी पुलावरून जात असताना एक तरुण शिवाजी पुलावरून नव्या अर्धवट पुलावर चढलेला नजरेस पडला. हा प्रकार पाहून पोर्ले तर्फ ठाणे (ता. पन्हाळा) येथील मराठा कार्यकर्ते प्रेमजित पाटील, प्रशांत खवरे, श्रीधर शिंदे, सुशील शेवडे यांनी क्षणाचाही विलंब न करता पुलाकडे धाव घेत नवनाथला मिठी मारून पकडले. या प्रसंगाने पाहणाºयांच्या अंगाचा थरकाप उडाला. त्याला कार्यकर्त्यांनी पकडल्यानंतर तो आरक्षणाच्या घोषणा देत होता. ‘कधी मिळणार आरक्षण, मला मरू द्या’, ‘मला सहन होत नाही,’ अशी आरडाओरड करीत होता. कार्यकर्त्यांनी त्याला लक्ष्मीपुरी पोलिसांच्या ताब्यात दिले.

या प्रकाराची माहिती समजताच स्थानिक गुन्हे अन्वेषण शाखेचे निरीक्षक तानाजी सावंत यांनी पुलाकडे धाव घेतली. नवनाथ कारंडे याला घेऊन ते करवीर पोलीस ठाण्यात आले. याठिकाणी पोलीस अधीक्षक डॉ. देशमुखही पाठोपाठ आले. त्यांनी कारंडे याच्याकडे चौकशी केली असता माझे वडील सार्वजनिक बांधकाम विभागात नोकरीला होते. सेवानिवृत्तीनंतर त्यांच्या जागी मला नोकरी मिळेल, अशी आशा होती. मी दिव्यांग असल्याने जिल्हाधिकारी कार्यालयाकडे अनेकवेळा नोकरीसाठी अर्ज केला. उपोषणही केले; परंतु मला नोकरी मिळाली नाही. आपली कोणीच दखल घेत नसल्याच्या नैराश्येतून उडी मारण्याचा निर्णय घेतल्याचे त्याने सांगितले. डॉ. देशमुख यांनी त्याला दिलासा देत त्याचे मन परिवर्तन करण्याचा प्रयत्न केला. नवनाथ विवाहित असून, त्याला एक मुलगी आहे. याबाबत करवीरपोलीस ठाण्यात नोंद झालीआहे.

साहेब, तुम्हाला शपथ आहे...
आत्महत्येपासून परावर्तित केल्यानंतरही काही न ऐकण्याच्या स्थितीत असणाºया नवनाथला पोलिसांच्या स्वाधीन केले. त्यावेळी मराठाबांधवांनी त्याला मारू नका, तुम्हाला मराठा समाजाची शपथ असे पोलिसांना सांगितले. त्यावेळी एका पोलिसाने ‘भावांनो, मी पण मराठा आहे. नवनाथला हात न लावता त्याला सुखरूप घरी पोहोचवतो,’ असे सांगितले.