प्रांताधिकारी, मंडल अधिकाऱ्यांची यड्राव फाट्यावर कारवाई

सव्वा लाखाचा दंड वसूल : बेकायदेशीर वाळू, दगड वाहतूक, ट्रक, डंपरचा पाठलाग करून घेतले ताब्यात

इचलकरंजी : वाळू आणि दगडांची बेकायदेशीरपणे वाहतूक करणाऱ्या पाच डंपर व तीन ट्रकवर बुधवारी यड्राव फाटा येथे कारवाई करीत सव्वा लाख रुपयांचा दंड वसूल करण्यात आला. कारवाई सुरू असताना एका चालकाने डंपरसह पलायन करण्याचा प्रयत्न केला; पण पोलिसांनी त्याचा पाठलाग करून त्याला ताब्यात घेतले. ही कारवाई मंडल अधिकारी बी. डी. कोळी व त्यांच्या पथकाने केली.
हातकणंगले व शिरोळ तालुक्यांत मोठ्या प्रमाणात वाळू आणि दगडांची तस्करी व बेकायदेशीर वाहतूक होत असल्याबद्दल अनेक तक्रारी आहेत. सातत्याने कारवाईचा बडगा उगारूनही याला आळा घालण्यात प्रशासनाला यश येत नाही. नजीकच्या कर्नाटक व शिरोळ तालुक्यांतील वाळूचे ट्रक नदीवेस मार्गे मोठ्या प्रमाणात शहरात येत होते. याठिकाणी अनेकवेळा कारवाई झाल्याने बेकायदा वाहतूक करणाऱ्यांनी आता नवा मार्ग शोधला आहे. शिरोळ तालुक्यातील जांभळी-नांदणी-यड्रावमार्गे शहापुरातून ही वाहतूक केली जात आहे. याचा सुगावा लागल्याने प्रांताधिकारी अश्विनी जिरंगे यांनी तहसीलदार, मंडल अधिकारी व तलाठ्यांना सूचना देऊन कारवाईचे आदेश दिले होते. त्यानुसार बुधवारी पहाटेपासूनच शहापूर रस्त्यावर सापळा लावण्यात आला होता.
पहाटे पाच वाजल्यांपासून शहापुरात येणारे ट्रक व डंपर यड्राव फाटा येथे अडविण्यात आले. यावेळी चालक आणि शासकीय अधिकारी यांच्यात शाब्दिक वाद झडला. त्यामुळे पोलिसांना पाचारण करावे लागले.
शहापूर पोलीस ठाण्याचे निरीक्षक सतीश पवार व त्यांचे सहकारी घटनास्थळी आल्यानंतर पोलीस बंदोबस्तात कारवाई सुरू करण्यात आली.
यावेळी (एमएच ०९ बीसी २९५७) संतोष भोसले यांच्या डंपरवर, (एमएच ०९ सीयू २६५०) विजय नलवडे, (एमएच ०९ जे ५०६१) विजय नलवडे, (एमएच ०९ एल ४९६७) गंगाराम शिंगाडे व (एमएच ०९ बीसी १३८) मेहबूब नदाप या पाच डंपरवर, तर (एमएच ०९ झेड ८२३) रमेश कलगुटगी, (एमएच ०९ झेड १९४) रफिक नदाफ व (एमएच ०९ सीए १४३०) पापा राठोड या तीन ट्रकवर कारवाई करण्यात आली.
ही कारवाई मंडल अधिकारी बी. डी. कोळी, तलाठी महेश साळवी, मच्छिंद्र कुंभार, सुरेश भानुसे, पी. टी. धोंड, कोतवाल एस. एस. कोळी, नेताजी पाटील यांच्या पथकाने केली. (प्रतिनिधी)
 

४ही कारवाई सुरू असतानाच (एमएच ०९ बीसी २९५७) या डंपरचा चालक संतोष भोसले याने नकळतपणे डंपर सुरू करून घटनास्थळावरून पलायन करण्याचा प्रयत्न केला. मात्र, ही बाब लक्षात येताच पोलिसांनी त्याचा पाठलाग करत थोड्याच अंतरावर त्याला पकडले.
४डंपरचालकांकडून प्रत्येकी दहा हजार रुपयांप्रमाणे ५० हजार आणि ट्रकचालकांकडून प्रत्येकी २५ हजार रुपयांप्रमाणे ७५ हजार असा सव्वा लाख रुपये दंड वसूल करण्यात आला.