गडहिंग्लजला लॉकडाउनच्या पार्श्वभूमीवर चोख बंदोबस्त

शहरात येणाऱ्या वाहनांची तपासणी, तसेच विनाकारण फिरणाऱ्यांवर कारवाई करण्यासाठी पोलीस बंदोबस्त ठेवला आहे.

शहरातील मुख्य रस्त्यावरील आजरा व चंदगड मार्गावरील वाहतूक नियंत्रणासाठी दसरा चौक, संकेश्वर व निपाणीहून येणाऱ्या मार्गावर वीरशैव बँक, गारगोटी मार्गावरील भगवा चौक याठिकाणी बॅरिकेडस्‌ लावले आहेत.

प्रमुख मार्गांसह शहरातील बाजारपेठ व अन्य चौकांत पोलीस व गृहरक्षक दलाच्या जवानांची तैनात ठेवली आहे. रविवार (२३) पर्यंत शहरातील सर्व व्यवहार बंद राहणार आहेत. दवाखाने व औषध दुकाने वगळता इतर अत्यावश्यक दुकानेही बंद ठेवण्याच्या सूचना दिल्या आहेत.

लॉकडाउन काळात विनाकारण घराबाहेर पडणाऱ्यांवर कडक कारवाई करण्यात येणार आहे. वाहन घेऊन फिरणाऱ्यांना दंडात्मक व वाहनांवरील जप्तीच्या कारवाईला सामोरे जावे लागणार आहे. शहरात त्यासाठी विशेष पथक गस्तीसाठी नेमले आहे.

नागरिकांनी नियमांचे पालन करावे आणि घरी राहून प्रशासनाला सहकार्य करण्याचे आवाहन पोलिसांनी केले आहे.