भुदरगड पंचायत समितीच्या उपसभापतीपदी अजित देसाई

गारगोटी : भुदरगड पंचायत समितीच्या उपसभापतीपदी अजित गणपतराव देसाई यांची बिनविरोध निवड झाली. या निवड सभेच्या अध्यक्षस्थानी तहसीलदार अश्विनी अडसूळ होत्या. यावेळी गटविकास अधिकारी एस. जे. पवार, सभापती आक्काताई नलवडे उपस्थित होत्या.

भुदरगड पंचायत समितीवर आमदार प्रकाश आबिटकर गटाची सत्ता आहे. उपसभापती सुनील निंबाळकर यांनी आपल्या पदाचा राजीनामा दिल्याने हे पद रिक्त होते. रिक्त जागी अजित देसाई यांची दुसऱ्यांदा निवड झाली. सन २०१७ -२०१८मध्ये आणि आता पुन्हा दुसऱ्यांदा ३१ वे उपसभापती होण्याचा बहुमान त्यांना मिळाला. एकाच कारकिर्दीत दोनदा उपसभापती होणारे ते एकमेव आहेत. आकुर्डे जिल्हा परिषद मतदारसंघाला सभापती आणि उपसभापती ही दोन्ही पदे मिळाल्याने दुर्मीळ योगायोग जुळून आला आहे.

या निवडीनंतर झालेल्या सत्कार समारंभात दत्तात्रय उगले यांनी स्वागत तर प्रकाश पाटील यांनी प्रास्ताविक केले. कल्याणराव निकम यांनी मनोगत व्यक्त केले. यावेळी नूतन उपसभापती देसाई यांचा मान्यवरांचे हस्ते सत्कार करण्यात आला. कार्यक्रमाला ज्येष्ठ नेते व जिल्हा परिषदेचे माजी उपाध्यक्ष बी. एस. देसाई, प्राचार्य अर्जुन आबिटकर, गोकुळचे संचालक नंदकुमार ढेंगे, पंचायत समिती सदस्य सुनील निंबाळकर, सरिता वरंडेकर, स्नेहल परिट, कीर्ती देसाई, संग्रामसिंह देसाई, आदी उपस्थित होते. सूत्रसंचालन विद्याधर परिट यांनी केले तर आक्काताई नलवडे यांनी आभार मानले.