अश्लील चॅटिंगची तक्रार देण्याची धमकी देण्याऱ्यास अटक

कुरुंदवाड : फेसबुकवर मैत्रीचा गैरफायदा घेऊन मोबाईलवर अश्लील चॅटिंग केल्याची पोलिसात तक्रार दाखल करण्याची धमकी देऊन ३ लाख २५ हजाराचा गंडा घालून जिवे मारण्याची धमकी दिल्याप्रकरणी नागराज शंकर दैवज्ञ (रा. कबनूर, ता. शिगाव, जि. हावेरी) याला कुरुंदवाड पोलिसांनी अटक केली. त्याला येथील प्रथमवर्ग न्यायालयात हजर केले असता, सात दिवसांची पोलीस कोठडी सुनावण्यात आली. याबाबतची तक्रार अमोल रावसोा लठ्ठे (रा. घोसरवाड, ता. शिरोळ) याने कुरुंदवाड पोलिसांत दिली.

पोलिसांतून मिळालेल्या माहितीनुसार, तक्रारदार लठ्ठे याची सप्टेंबरमध्ये नागराज दैवज्ञ याच्या ‘राणी’ या नावाने फेसबुक अकौंटवर मैत्री झाली. दोघांचे मोबाईलवर अश्लील चॅटिंग होत एकमेकांशी बोलणे सुरु झाले. या अश्लील चॅटिंगचा गैरफायदा घेऊन ‘तू माझ्याशी चॅटिंग करून फोटो टाकला आहेस, तुझी दिल्लीत तक्रार करतो’, अशी धमकी देत प्रथम दीड लाखाची मागणी केली. तक्रारीच्या भीतीने लठ्ठे गूगल पेजवरुन दैवज्ञला दीड लाखाची रक्कम दिली. त्यानंतर ८ डिसेंबरला संशयित आरोपीने पुन्हा फोन करुन लठ्ठेकडे १ लाख ७५ हजाराची मागणी केली. अशी एकूण ३ लाख २५ हजार रुपयांची रक्कम संशयित दैवज्ञ यास गूगल पे केली. त्यानंतर आरोपीने पुन्हा मोबाईलवरील अश्लील चॅटिंग मेसेज परत करण्यासाठी ५० हजार रुपयांची मागणी केली. त्यासाठी पैसे घेऊन कोल्हापुरात येण्यास सांगितले.

वारंवार भीती घालून खंडणी वसूल करत असल्याने लठ्ठे याने वैतागून कुरुंदवाड पोलिसांना या घटनेची माहिती दिली. पोलिसांनी सापळा रचून संशयित आरोपी दैवज्ञ याला कोल्हापुरातील डी मार्ट परिसरात अटक केली. या घटनेचा तपास पोलीस निरीक्षक चंद्रकांत निरावडे यांच्या मार्गदर्शनाखाली सहायक फौजदार चव्हाण करीत आहेत.

फोटो - २५१२२०२०-जेएवाय-०५-संशयीत नागराज दैवज्ञ