ताराबाई पार्कात तरुणावर प्राणघातक हल्ला

कोल्हापूर : किरकोळ कारणावरून हत्याराने तरुणावर प्राणघातक हल्ला करण्याचा प्रकार ताराबाई पार्क येथील दूरसंचार निगमच्या कार्यालयानजीक घडला. या हल्ल्यात वेद प्रकाश खानोलकर (वय २७, रा. जोतिर्लिंग कॉलनी, पाचगाव रोड, कोल्हापूर) हा तरुण गंभीर जखमी झाला. याप्रकरणी दोघांवर शाहूपुरी पोलीस ठाण्यात गुन्हा नोंद झाला आहे.

किरकोळ कारणावरून धनराज प्रकाश व्हटकर व त्याच्या दोन मित्रांनी वेद खानोलकर याच्यावर हत्याराने प्राणघातक हल्ला केला. त्याला ठार मारण्याचा प्रयत्न केला. या हल्ल्यात वेद याच्या डोक्यात गंभीर दुखापत झाली. त्याला खासगी रुग्णालयात उपचारासाठी तातडीने दाखल करण्यात आले. हा प्रकार रविवारी मध्यरात्रीच्या सुमारास घडला. या प्रकरणी वेदचे वडील प्रकाश गजानन खानोलकर यांनी मंगळवारी रात्री शाहूपुरी पोलीस ठाण्यात तक्रार दिली. त्यानुसार पोलिसांनी धनराज व्हटकर व त्याच्या दोन मित्रांवर गुन्हे नोंदवले.