‘खंडोबा’ची पीटीएम ‘ब’वर मात

नेताजी चषक फुटबॉल : पॅट्रियट अनुपस्थित; फुलेवाडी संघाला पुढे चाल

कोल्हापूर : नेताजी चषक फुटबॉल स्पर्धेत मंगळवारी झालेल्या सामन्यात खंडोबा तालीम मंडळाने पीटीएम ‘ब’ संघावर २-१ अशा गोलफरकाने विजय मिळविला, तर पॅट्रियट संघ अनुपस्थित राहिल्याने फुलेवाडी संघाला पुढे चाल देण्यात आली.
छत्रपती शाहू स्टेडियमवर दुसरा सामना खंडोबा तालीम मंडळ विरुद्ध पीटीएम ‘ब’ यांच्यामध्ये झाला. अत्यंत वेगवान झालेल्या सामन्यात दुसऱ्याच मिनिटाला खंडोबा तालीम मंडळाच्या सागर पोवारने पीटीएम ‘ब’ संघाची बचावफळी भेदत मारलेला चेंडू गोलपोस्टवरून गेल्याने त्यांची गोल करण्याची संधी हुकली. पीटीएम ‘ब’ संघाकडून पवन सरनाईक, रोहन जाधव यांनी गोल करण्याचा प्रयत्न केला; मात्र समन्वयाअभावी त्यांचीही संधी वाया गेली.
खंडोबा तालीम मंडळाकडून २६व्या मिनिटाला झालेली चढाई रोखताना पीटीएम ‘ब’चा खेळाडू रोहन जाधवच्या डोक्याला लागून स्वयंगोल झाला. या गोलनंतर मात्र खंडोबा तालीम मंडळाने आघाडी अधिक भक्कम करण्यासाठी आक्रमक पवित्रा घेतला. ३७ व्या मिनिटाला खंडोबा तालीम मंडळाच्या सिद्धार्थ शिंदेने गोल नोंदवीत सामन्यात २-० अशी आघाडी घेतली. मध्यंतरापर्यंत ही आघाडी कायम राहिली. उत्तरार्धात, खंडोबा मंडळाने बचावात्मक खेळी केली; तर पीटीएम ‘ब’कडून अनिकेत कुंभार, शुभम मोहिते, पवन सरनाईक, गणेश जगताप, सुमित जाधव यांनी खाते उघडण्यासाठी शर्थीचे प्रयत्न सुरू केले. यामध्ये पीटीएम ‘ब’कडून
५४ व्या मिनिटाला रोहन जाधवने गोल करीत आघाडी कमी केली.
दरम्यान, नेताजी चषक फुटबॉल स्पर्धेत मंगळवारी पहिला सामना फुलेवाडी फुटबॉल संघ विरुद्ध पॅट्रियट संघ यांच्यामध्ये होता. मात्र, पॅट्रियट संघ अनुपस्थित राहिल्याने फुलेवाडी संघाला पुढे चाल देण्यात आली.