पुरोगामी वृत्तपत्र विक्रेता संघटनेचे संस्थापक भाऊसाहेब सूर्यवंशी यांचे निधन

इचलकरंजी : येथील पुरोगामी वृत्तपत्र विक्रेता संघटनेचे संस्थापक-अध्यक्ष आणि महाराष्ट्र राज्य वृत्तपत्र विक्रेता संघटनेचे सल्लागार भाऊसाहेब बाबू सूर्यवंशी (वय ८५) यांचे चंदूर (ता. हातकणंगले) येथील शाहूनगरमध्ये राहत्या घरी मंगळवारी पहाटे निधन झाले. त्यांच्यावर इचलकरंजीतील पंचगंगा नदीघाटावर अंत्यसंस्कार करण्यात आले. त्यांच्या पश्चात दोन मुले, सुना, नातवंडे असा परिवार आहे.

अंत्यसंस्कारावेळी झालेल्या शोकसभेत अनेक मान्यवरांनी सूर्यवंशी यांच्या आठवणींना उजाळा दिला. सुरुवातीला वृत्तपत्र विक्रेत्यांच्या न्याय्य हक्कांसाठी त्यांनी संपूर्ण महाराष्ट्र पिंजून काढला. शहरात संघटना उभारून जिल्हा व राज्य संघटनेच्या बांधणीसाठी बहुमोल योगदान दिले.

अंत्यसंस्कारावेळी पश्चिम महाराष्ट्र वृत्तपत्र विक्रेता संघटनेचे अध्यक्ष शिवगोंडा खोत, पुरोगामी वृत्तपत्र विक्रेता संघटनेचे सचिव अण्णा गुंडे, राज्य वृत्तपत्र विक्रेता संघटनेचे उपाध्यक्ष विकास सूर्यवंशी, सांगली वृत्तपत्र विक्रेता संघटनेचे अध्यक्ष मारुती नवलाई, कम्युनिस्ट पक्षाचे दत्ता माने, सदा मलाबादे, प्रसाद कुलकर्णी, आप्पा पाटील, आदींसह विक्रेते उपस्थित होते. रक्षाविसर्जन गुरुवारी (दि. ८) सकाळी ९ वाजता पंचगंगा नदीघाटावर आहे.

फोटो ओळी

०६०४२०२१-आयसीएच-०१ - भाऊसाहेब सूर्यवंशी