भाळवणी विद्यालयात शिक्षिकेला बेदम मारहाण

घरगुती वादातून प्रकार : विटा पोलिसांत गुन्हा दाखल

विटा : घरगुती वादातून भाळवणी (ता. खानापूर) येथील न्यू इंग्लिश स्कूलमधील शिक्षिका सौ. सरिता उदय माने (वय ३३, रा. ढवळेश्वर, मूळ गाव मिरज) यांना त्यांच्याच दोन नातेवाईक महिलांनी विद्यालयातच बेदम मारहाण करून जखमी केले. ही घटना सोमवारी दुपारी अडीचच्या सुमारास घडली. याप्रकरणी आज, बुधवारी दुपारी शिक्षिका सौ. सरिता माने यांनी निर्मला आनंदराव शेवाळे (रा. म्हासोली, ता. कऱ्हाड) व तिची आई जयश्री निवासराव जगताप (रा. वडगाव हवेली, ता. कऱ्हाड) या दोघींविरुध्द विटा पोलिसांत फिर्याद दिल्यानंतर गुन्हा दाखल करण्यात आला.मिरज येथील सरिता माने अडीच वर्षापासून भाळवणी विद्यालयात शिक्षिका आहेत. त्यांचे पती खासगी रुग्णालयामध्ये जनसंपर्क अधिकारी आहेत. सोमवारी दुपारी २.३० वाजता सौ. माने शाळेत असताना एका महिलेने त्यांना बाहेर व्हरांड्यात व्यासपीठावर बोलाविले. त्यावेळी प्रवेशद्वारातून सौ. माने यांची आतेबहीण छाया शेवाळे यांची सून निर्मला शेवाळे व तिची आई जयश्री जगताप शाळेत आल्या. त्यावेळी निर्मला यांनी, ‘माझ्या पतीला तुझ्या वडिलांनी कोठे कामाला लावले आहे, तुझीही नोकरी घालविते’, असे म्हणत सौ. माने यांना या दोघांनी लाथा-बुक्क्यांनी मारहाण करीत चावा घेऊन जखमी केले. त्यावेळी शाळेतील अन्य कर्मचाऱ्यांनी मध्यस्थी करून भांडण सोडविले. त्यानंतर सौ. माने यांना मिरजेच्या शासकीय रुग्णालयात उपचार केल्यानंतर आज, बुधवारी निर्मला शेवाळे व तिची आई जयश्री जगताप या दोघींविरुध्द विटा पोलीस ठाण्यात गुन्हा दाखल केला. (वार्ताहर)