संक्षिप्त क्राईम

इचलकरंजी : जवाहरनगर येथील परिसरात केवळ आपले वर्चस्व व दहशत राहावी, या कारणातून दोघांनी एका युवकाला दगडाने बेदम मारहाण केली. प्रमोद बाळू भिसे (वय २४, रा. मरगूबाई मंदिरसमोर, जवाहरनगर) असे जखमीचे नाव आहे. याप्रकरणी अजित सलगर व यासीन हटेली (पूर्ण नाव समजू शकले नाही) यांच्यावर शिवाजीनगर पोलीस ठाण्यात गुन्हा दाखल करण्यात आला आहे. ही घटना मंगळवारी (दि.१५) रात्री घडली.

.............

मोटारसायकल अपघात

इचलकरंजी : सांगली नाका परिसरात दोन मोटारसायकलींची समोरासमोर धडक होऊन झालेल्या अपघात एकजण जखमी झाला. महंमद असीम शेख (वय ५०, रा. कळे, ता. कराड) असे त्याचे नाव आहे. त्यातील दुसरा मोटारसायकलस्वार घटनास्थळावरून मोटारसायकल सोडून पसार झाला आहे. याबाबत त्याच्या मोटारसायकल क्रमांकावरून गावभाग पोलिसांनी त्याच्याविरोधात गुन्हा दाखल केला आहे.

....................

चोरट्या महिलेस अटक

इचलकरंजी : दिवसा घरात चोरी करणाऱ्या एका महिलेस स्थानिक गुन्हे अन्वेषण शाखेच्या पथकाने अटक केली. सुप्रभा दत्तात्रय महाडिक (वय ७०, रा. पुलाची शिरोली) असे तिचे नाव आहे. तिच्याकडून चांदीचे ग्लास, निरंजन, तीन लहान वाट्या, घंटी, अगरबत्ती स्टॅण्ड असा सुमारे दहा हजार ९७५ रुपयांचा मुद्देमाल जप्त केला. तिने कागवाडे मळ्यातील पंचरत्न अपार्टमेंटमध्ये चोरी केल्याचे कबूल केले आहे. या चोरीची शिवाजीनगर पोलीस ठाण्यात नोंद झाली आहे.