शालिनी स्टुडिओचा रेखांकन आदेश रद्द करा

कोल्हापूर : शालिनी सिनेटोनचा रेखांकन आदेश रद्द करा, शालिनी व जयप्रभा स्टुडिओची भूमी बिल्डरांच्या घशात जाऊ देणार नाही, शालिनी स्टुडिओ चित्रीकरणासाठी आरक्षित झालाच पाहिजे, अशा मागण्यांचे फलक हाती घेऊन गुरुवारी अखिल भारतीय मराठी चित्रपट महामंडळच्यावतीने खरी कॉर्नर कॅमेरा मानस्तंभ येथे मूक ठिय्या आंदोलन करण्यात आले. स्टुडिओचे प्राणपणाने जतन करण्याची सर्वांनी शपथ घेतली.

चित्रपट सृष्टीचे माहेरघर असलेल्या शालिनी व जयप्रभा स्टुडिओचे अस्तित्व कायद्याच्या, नियमांच्या पळवाटा काढून नामशेष करण्यात येत आहे. त्यातच आता शालिनी सिनेटोनच्या जागेवर बांधकामासाठी रेखांकन करण्याचे आदेश देण्यात आले आहेत. याविरोधात अखिल भारतीय मराठी चित्रपट महामंडळाने आंदोलनाचे पाऊल उचलले आहे. त्याअंतर्गत गुरुवारी कॅमेरा मानस्तंभ येथे सर्व चित्रकर्मींनी कपाळाला काळ्या पट्ट्या बांधून मूक ठिय्या आंदोलन केले. शनिवारी बिंदू चौक येथे मेणबत्त्या लावून शासनाचा निषेध करण्यात येणार आहे.

या वेळी महामंडळाचे उपाध्यक्ष धनाजी यमकर म्हणाले, स्टुडिओ भोवतालच्या परिसरासह फक्त चित्रीकरणासाठीच उपयोग करावयाचा आहे. हेरिटेजमध्ये नोंद असतानाही शालिनी स्टुडिओची इमारत पाडली गेली, तर भविष्यात जयप्रभा स्टुडिओचीही हीच अवस्था होणार आहे. शासनाकडून शालिनी स्टुडिओच्या जागेवर रेखांकन करणेस मंजुरी दिली आहे. तो शासन निर्णय तातडीने रद्द करावा.

या आंदोलनास हिंदू एकता आंदोलन या संस्थेचे अध्यक्ष गजानन तोडकर व जिल्हाध्यक्ष संजय साडविलकर व त्यांचे पदाधिकारी यांनी पाठिंबा दिला. या वेळी शरद चव्हाण, संचालक रणजित जाधव, अर्जुन नलवडे, सतीश बिडकर, अमर मोरे, अजय कुरणे, अरुण चोपदार, संग्राम भालकर, इम्तियाज बारगीर, राहुल राजशेखर, महादेव साळोखे, छाया डवरी, बबिता काकडे, रवींद्र बोरगावकर, नम्रता गोडबोले, ऐश्वर्या पाटील, अरुण पाटील यांच्यासह कलाकार, तंत्रज्ञ, कामगार उपस्थित होते.

--

फोटो नं ०१०७२०२१-कोल-चित्रपट महामंडळ

ओळ : कोल्हापुरातील कॅमेरा मानस्तंभ येथे गुरुवारी अखिल भारतीय मराठी चित्रपट महामंडळाच्यावतीने शालिनी व जयप्रभा स्टुडिओचे जतन व्हावे, या मागणीसाठी मूक ठिय्या आंदाेलन करण्यात आले.

---