कागलमधील बागेची चित्रपटसृष्टीलाही भुरळ

जहाँगीर शेख ।
लोकमत न्यूज नेटवर्क
कागल : दूधगंगा नदी आणि जयसिंगराव तलाव, पाझर तलाव यांच्यामध्ये वसलेल्या कागल शहरात वृक्षसंपदा कमी नाही. सामाजिक वनीकरण, महाराष्ट्र शासनाचा जैव विविधता पार्क येथे आहे. याचबरोबर कागल नगरपालिकेच्या तीन बागा, शाहू साखर कारखान्याच्या मुख्य कार्यालयासमोरील बगीचा कागलचे सौंदर्य खुलविण्याचे काम करीत आहेत. जयसिंगराव पार्कातील श्रीमंत विजयादेवी घाटगे बगीचा पर्यटकांना आकर्षित करणारा, तर कारखाना कार्यालयासमोरील बगीचा ज्येष्ठ नागरिकांपासून शहरात कामानिमित्त आलेल्या लोकांसाठी विरंगुळ्याचे ठिकाण बनले आहे. काही किरकोळ अपवाद वगळता शहरातील बागबगीचे ठिकठाकच आहेत.
शहरातील निपाणी वेसजवळ असणारे राजर्षी शाहू उद्यान जुने आहे. येथे आकर्षक झाडे आहेत. लहान मुलांसाठी खेळणी आहेत. यातील काही मोडली गेली आहेत. येथील कारंजाही बंद आहे. येथील बगीचाही साधारणच आहे. छत्रपती संभाजीराजे चौकाजवळ असणारे छत्रपती शिवाजी बालोद्यान हे देखील एकेकाळी शहरातील नागरिकांना आकर्षित करणारे उद्यान होते. येथील कोरवी खण मुजवून हे उद्यान विकसित केले होते. कालांतराने पालिकेचे दुर्लक्ष होत गेले. त्यामुळे सध्या येथे केवळ नावापुरते बालोद्यान आहे. येथील श्री स्वामी समर्थ आध्यात्मिक केंद्राला ही जागा दिल्याने तेथे मंदिर उभारले गेले आहे. आमदार हसन मुश्रीफ हे मंत्री असताना कागल शहरासाठी जवळपास दोन एकर जागेत जो विशेष बगीचा मंजूर करून आणला, त्यास कागलचे भूतपूर्व अधिपती कै. श्रीमंत जयसिंगराव घाटगे यांच्या पत्नी कै. श्रीमंत विजयादेवी घाटगे यांचे नाव दिले आहे. शहरातील सर्वांत सुंदर असा हा बगीचा आहे. याशिवाय यशवंत किल्ला अ‍ॅम्युझमेन्ट पार्क, पाझर तलाव येथील कै. व्ही. ए. घाटगे बोटिंग क्लबवरही बगीचा विकसित करण्याचा प्रयत्न पालिकेने केला, पण तो अर्धवटच राहिला आहे. नगरपालिकेने यापूर्वी जयसिंगराव तलावाजवळ हर्बल गार्डन, जैव विविधता पार्क उभारण्याच्या घोषणा सर्वसाधारण सभेत झाल्या, पण त्या हवेतच राहिल्या आहेत.
सध्या शहरात झपाट्याने उपनगरे तयार होत आहेत. तेथे बगीच्यासाठी जागा आरक्षित करणे आणि तेथे उद्याने तयार करण्याकडे पालिकेने लक्ष दिले पाहिजे. खरे तर भूखंड विकसित करणाऱ्याकडेच ही जबाबदारी दिली पाहिजे. बगीच्यातून सकाळी सकाळी फेरफटका मारावा, व्यायाम करावा, अशा उद्यानांचीही अजून गरज आहे. बगीच्यामधील साहित्याची मोडतोड हाही चिंतेचा विषय आहे.
राणी विजयादेवी गार्डनचे आकर्षण
या बगीच्याची रचना आणि उभारणी अत्यंत आकर्षक आहे. पालिकेने देखरेखही चांगली ठेवली आहे. दोन एकर जागेत पसरलेल्या या बगीच्यात कारंजा, छोटे पूल, पर्णकुटी, सजावट कमानी, उंच कमानी असणारी गॅलरी, भिंत असलेले संवाद केंद्र, हिरवळीचे गालिचे, विविध झाडे, फुले यांनी हा बगीचा बहरलेला आहे. येथे एका हिंदी, तर तीन मराठी चित्रपटांचे चित्रीकरणही झाले आहे. बागेत प्रवेशासाठीही दोन रूपयाचे तिकीट आकारले जाते.

राजर्षी शाहू उद्यानाला विशेष महत्त्व..
डॉ. बाबासाहेब आंबेडकर नगरालगत असलेल्या राजर्षी शाहू उद्यानाला विशेष महत्त्व आहे. येथे राजर्षी शाहूंचा शहरातील पहिला सार्वजनिक अर्धपुतळा १९६६ला उभारण्यात आला. हा पुतळा करवीरचे तत्कालीन छत्रपती शहाजी महाराज यांनी भेट दिला आहे. शाहू कारखान्याच्या कुस्ती स्पर्धेपूर्वी येथूनच क्रीडाज्योत नेली जाते. दलदलीने भरलेला छोटा तलाव मुजवून हे उद्यान विकसित करण्यात आले.

‘शाहू’चा बगीचा विरंगुळ्यासाठी
बाहेरगावाहून शासकीय व अन्य कामासाठी आलेले नागरिक विश्रांती, शिदोरी खाण्यासाठी शाहू साखर कारखान्याच्या मुख्य कार्यालयासमोरील बगीच्यात येतात. ऐतिहासिक इमारत, छत्रपती शाहूंचा भव्य पुतळा, सजावट, नारळाची झाडे, हिरवळीचे गालिचे आणि महामार्गालगतच्या ठिकाणामुळे येथे दिवसभर लोक येत असतात. सायंकाळी स्थानिक लोक येतात.