सत्ताधाऱ्यांचा ‘दावा’ अन विरोधकांची ‘हवा’

कोल्हापूर जिल्ह्याच्या राजकारणाचा केंद्रबिंदू असलेल्या ‘गोकुळ’ची निवडणूक यावेळेला वेगळ्या वळणावर पोहोचली होती. या निवडणुकीकडे संपूर्ण राज्याचे लक्ष लागले असून रविवारी मतदान झाल्यानंतर कोणाच्या ताब्यात ‘गोकुळ’च्या चाव्या जाणार या विषयी उत्सुकता शिगेला पाेहोचली आहे. दोन्ही आघाड्यांकडून राबविलेली प्रचार यंत्रणा, ठरावधारकांसाठी केलेली भांडवली गुंतवणूक, शेवटच्या टप्प्यातील लावलेल्या जोडण्या आणि नेत्यांनी पणास लावलेली प्रतिष्ठा पाहता, यावरून सभासदांचा कल मांडण्याचा प्रयत्न केला आहे.

लोकमत न्यूज नेटवर्क

कोल्हापूर : ‘गोकुळ’च्या मतदानानंतर सत्ताधारी आघाडीने मताधिक्याबाबत केलेले दावे आणि प्रत्यक्ष मतदान केंद्रावर तयार झालेली विरोधी आघाडीची हवा पाहता निकाल धक्कादायक लागण्याची शक्यता आहे. करवीर, राधानगरी व भुदरगड तालुकेच ‘गोकुळ’च्या सत्तेच्या चाव्या कोणाच्या हातात सोपवायच्या हे ठरवणार असून तेथील राजकीय समीकरणे आणि झालेले मतदान पाहता, सत्तेचा लंबक विरोधी आघाडीकडून झुकला आहे, सत्ताधारी गटाचे संचालकही चांगल्या संख्येने संचालक मंडळात राहतील, असे चित्र आहे. दोन्ही आघाड्यांनी ते गटाशी प्रामाणिक राहिले तर असा निकाल लागू शकतो अन्यथा चित्र उलटे दिसू शकते.

‘गोकुळ’च्या सत्तेसाठी गेली दोन महिने रणधुमाळी सुरू आहे. सत्ताधारी राजर्षी शाहू आघाडी व विरोधी राजर्षी शाहू शेतकरी आघाडीमध्ये निकराची लढाई झाली. एका एका मतासाठी शेवटपर्यंत सर्व प्रकारच्या तडजोडी करण्यात आल्या. सर्व प्रकारचे तंत्र वापरल्याने निवडणुकीत इर्षा तयार झाली होती. रविवारी मतदान केंद्रावरही हीच इर्षा पहावयास मिळाली.

करवीरमध्ये सत्तारूढ आणि विरोधकांनी रांगेतून आणलेल्या ठरावांची संख्या पाहता येथे विरोधी आघाडी किमान ११० चे मताधिक्य घेईल, असे दिसते. चंदगड, गडहिंग्लज व कागल तालुक्यात सत्ताधारी आघाडीने शेवटपर्यंत आपला दबदबा कायम राखल्याने या तालुक्यात सरासरी ३० पासून ५० चे मताधिक्य सत्तारूढ गटाचे राहील. पन्हाळा, हातकणंगले, आजरा, शाहूवाडी तालुक्यातही सत्तारूढ गट मुसंडी मारण्याची शक्यता आहे. या चार तालुक्यात किमान २८० चे मताधिक्य घेण्याची शक्यता आहे. शिरोळ, गगनबावडा तालुक्यात विरोधी आघाडीने चांगलाच जम बसविल्याचे चित्र आहे. येथे किमान १०० चे मताधिक्य मिळू शकते. राधानगरी व भुदरगड तालुक्यात विरोधक मोठी आघाडी घेणार हे निश्चित आहे.

एकूणच, बारा तालुक्यात झालेले मतदान, त्यानंतर केलेले दावे, प्रतिदावे व प्रत्यक्ष मतदान केंद्रावरील हवा या सगळ्याचा विचार करता सत्तेचा लंबक विरोधी आघाडीकडे झुकण्याची शक्यता अधिक आहे.

‘बाळूमामा’, ’विठलाई’कोणाला पावणार

दोन्ही आघाड्यांनी ठरावधारकांच्या शपथा घेऊनच केंद्रावर आणले होते. एका आघाडीने ‘बाळूमामा’, ‘विठलाई’ची शपथ घेतली तर दुसऱ्या आघाडीने ‘रेणुका’ची शपथ घेतली. त्यामुळे हे देव कोणाला पावणार याविषयी उत्सुकता लागली आहे.

क्रॉस व्होटींग ठरणार अनेकांची डोकेदुखी

पॅनेल टू पॅनेल मतासाठी दोन्ही आघाडीच्या नेत्यांनी कंबर कसली होती. एकही मत इकडे तिकडे होऊ नये, याची दक्षता घेतली होती. पॅनेल टू पॅनेल मते घेत, सोबतीला क्रॉस व्होटींगमध्ये बाजी मारणाराच विजयापर्यंत सरकणार आहे. तर क्रॉस व्होटींगच अनेकांची डोकेदुखी ठरणार हे निश्चित आहे.

दोन्ही आघाड्यांचे दावे प्रतिदावे -

तालुका एकूण मतदान सत्ताधारी विरोधी

करवीर ६३९ ३६४ ४३२

चंदगड ३४६ १९५ १९१

गडहिंग्लज २७२ १८० १६०

कागल ३८३ २२७ २००

भुदरगड ३७३ १६० २६०

राधानगरी ४५८ १५० ३५४

पन्हाळा ३५३ २२७ २०१

शिरोळ १३३ ९५ ८०

हातकणंगले ९५ ७५ ६६

आजरा २३३ २०० १००

गगनबावडा ७६ ३५ ६६

शाहूवाडी २८६ २०० १५०

एकूण ३६४७ २१०८ २२६०