आचारसंहिता पथक, मीडिया समिती ठेवणार नजर - ग्रामपंचायत निवडणूक

लोकमत न्यूज नेटवर्क

कोल्हापूर : ग्रामपंचायत निवडणुकीअंतर्गत सुरू असलेल्या आचारसंहितेचे योग्यरीत्या पालन होत आहे की नाही तसेच पेड न्यूज, सोशल कमेंट, सोशल मीडिया यांवर लक्ष ठेवण्यासाठी आचारसंहिता पथक व मीडिया समितीची नियुक्ती करण्यात आली आहे.

जिल्हाधिकारी दौलत देसाई यांनी ही समिती स्थापन केली असून कामकाज करण्यासाठी अध्यक्ष, सदस्य व सदस्य सचिव यांची उपविभागनिहाय नेमणूक करण्यात आली आहे. उपविभागीय अधिकारी हे समितीचे अध्यक्ष असून उपविभागीय पोलीस अधिकारी, तालुक्याचे तहसीलदार, गटविकास अधिकारी हे सदस्य आहेत; तर नायब तहसीलदार येथे सदस्य सचिव आहेत.

य अधिकाऱ्यांना आचारसंहिता, पेड न्यूज, सोशल कमेंट, सोशल मीडिया यांबाबत राज्य निवडणूक आयोगाच्या निर्देशाप्रमाणे कामकाज करून त्याची काटेकोरपणे अंमलबजावणी व वेळोवेळी अहवाल सादर करण्याची जबाबदारी देण्यात आली आहे.

--