विधानसभेची रंगीत तालीम ... प्रशासकीय पातळीवर जय्यत तयारी

दोन महिन्यांवर येऊन ठेपलेल्या विधानसभा निवडणुकीसाठी प्रशासकीय पातळीवर जोरदार तयारी सुरू आहे. अभिरूप मतदान प्रक्रिया पूर्ण करून निवडणूक विभागाने रंगीत तालीम घेतली. त्याचबरोबर जिल्हाधिकारी दौलत देसाई यांनी सर्व विधानसभा मतदारसंघाच्या निवडणूक अधिकाऱ्यांकडून निवडणुकीच्या तयारीचा आढावा घेऊन निर्देश दिले.

ठळक मुद्देअभिरूप मतदान प्रक्रिया पूर्ण : जिल्हाधिकाऱ्यांनी घेतला आढावा अंतिम मतदार यादीत ३० लाख ९० हजार ६६० मतदारांची नोंद

कोल्हापूर : दोन महिन्यांवर येऊन ठेपलेल्या विधानसभा निवडणुकीसाठी प्रशासकीय पातळीवर जोरदार तयारी सुरू आहे. अभिरूप मतदान प्रक्रिया पूर्ण करून निवडणूक विभागाने रंगीत तालीम घेतली. त्याचबरोबर जिल्हाधिकारी दौलत देसाई यांनी सर्व विधानसभा मतदारसंघाच्या निवडणूक अधिकाऱ्यांकडून निवडणुकीच्या तयारीचा आढावा घेऊन निर्देश दिले.

आगामी विधानसभा निवडणुकीची जोरदार तयारी जिल्हा निवडणूक विभागाकडून सुरू आहे. राजाराम तलाव येथील शासकीय गोदाम येथे ईव्हीएम (मतदान यंत्रे) व व्हीव्हीपॅटची गेल्या काही दिवसांपासून सुरू असलेली प्रथमस्तरीय तपासणी रविवारी पूर्ण झाली.

या ठिकाणी सकाळी ९ वाजता अभिरूप मतदान प्रक्रियेला सुरुवात करण्यात आली. उपजिल्हा निवडणूक अधिकारी सतीश धुमाळ यांच्या मार्गदर्शनाखाली सुमारे २२५ कर्मचाऱ्यांच्या उपस्थितीत एकूण २३० मतदान यंत्रांवर व व्हीव्हीपॅटवर ही प्रक्रिया सुरू राहिली. यामध्ये पहिल्या ९२ मतदान यंत्रांवर ५०० मतदान करण्यात आले. नंतर ९२ मतदान यंत्रांवर १००० मतदान व ४० मतदान यंत्रांवर मतदान करण्यात आले.

यानंतर झालेल्या मतांची खातरजमा करण्यासाठी व्हीव्हीपॅटमधील कागदी चिठ्ठ्याही पडताळण्यात आल्या. या ठिकाणी जिल्हाधिकारी दौलत देसाई यांनी भेट देऊन प्रक्रियेची पाहणी केली. या प्रक्रियेनंतर आता मतदान यंत्रांचे रॅँडमायझेशन (सरमिसळ) केले जाणार आहे. त्यानंतर ही यंत्रे विधानसभा मतदारसंघांमध्ये पाठविली जाणार आहेत.

दरम्यान, रविवारी दुपारी जिल्हाधिकारी कार्यालयात जिल्हाधिकारी दौलत देसाई यांनी सर्व निवडणूक अधिकारी व साहाय्यक निवडणूक निर्णय अधिकारी यांची बैठक घेऊन पूर्वतयारीचा आढावा घेतला.

यामध्ये मतदान केंद्रांची पाहणी केली आहे का? याची माहिती घेण्यात आली. त्याचबरोबर पुढील आठवड्यापासून होणाऱ्या व्हीव्हीपॅटसंदर्भातील जनजागृतीची तयारी करावी, निवडणुकीसाठी आवश्यक साहित्याची यादी तयार करावी, निवडणूक यंत्रणेचे आराखडे तयार करावेत, निवडणुकीसाठी लागणाऱ्या कर्मचाऱ्यांची यादी तयार करावी, असे निर्देश जिल्हाधिकाऱ्यांनी दिले.

यावेळी अप्पर जिल्हाधिकारी नंदकुमार काटकर, निवासी उपजिल्हाधिकारी संजय शिंदे, उपजिल्हा निवडणूक अधिकारी सतीश धुमाळ यांच्यासह सर्व निवडणूक निर्णय अधिकारी व साहाय्यक निवडणूक अधिकारी उपस्थित होते.

अंतिम मतदार यादी प्रसिद्ध; ३० लाख ९० हजार मतदारांची नोंद

विधानसभा निवडणुकीच्या पार्श्वभूमीवर भारत निवडणूक आयोगाकडून राबविण्यात आलेल्या मतदार याद्या पुनरीक्षण कार्यक्रमांतर्गत जिल्ह्याची अंतिम मतदार यादी ३१ आॅगस्टला प्रसिद्ध करण्यात आली. यामध्ये एकूण ३० लाख ९० हजार ६६० मतदारांची नोंद झाली आहे. त्यात चंदगड मतदारसंघात तीन लाख १८ हजार ९१३, राधानगरीत तीन लाख २५ हजार ५३८, कागलमध्ये तीन लाख २२ हजार ४६९, कोल्हापूर दक्षिणमध्ये तीन लाख २४ हजार ३६७, करवीरमध्ये तीन लाख ३१ हजार ७७, कोल्हापूर उत्तरमध्ये दोन लाख ८५ हजार ४४७, शाहूवाडीमध्ये दोन लाख ८७ हजार ४४७, हातकणंगलेमध्ये तीन लाख १७ हजार ६६८, इचलकरंजीमध्ये दोन लाख ९३ हजार २४३, शिरोळमध्ये तीन लाख १२ हजार ३९१ मतदारांचा समावेश आहे.