हुपरीतील एका नेत्यास कोरोना

हुपरी : हुपरी(ता. हातकणंगले) नगरपरिषदेतील एका पक्षाच्या पक्षप्रतोदांचा अहवाल कोरोना पॉझिटिव्ह आला आहे. गुरुवारी व शुक्रवारी छत्रपती शिवाजी महाराज, छत्रपती संभाजी महाराज जयंती सोहळा, रमजान ईद, तसेच शहरातील अन्य कार्यक्रमांतही या पदाधिकाऱ्याचा सक्रिय सहभाग राहिला आहे. या सर्वच समारंभात नगराध्यक्षा, मुख्याधिकारी यांच्यासह सर्व नगरसेवक, अधिकारी व संयोजक त्यांच्या सोबत होते. त्यामुळे या सर्वांवरती क्वारंटाईन होण्याची वेळ येण्याची शक्यता निर्माण झाली आहे.

माळभागावरती वास्तव्यास असणाऱ्या या पदाधिकाऱ्यांस गेल्या चार दिवसांपासून त्रास जाणवत होता. त्यामुळे त्यांनी दोन दिवसांपूर्वी आरटीपीसीआर तपासणीसाठी आपला स्वॅब दिला होता. तब्येत बिघडलेली असताना व तपासणीसाठी स्वॅब दिलेला असतानाही या पदाधिकाऱ्यांने छत्रपती शिवाजी महाराज, छत्रपती संभाजी महाराज जयंती, रमजान ईदसह शहरातील इतरही समारंभात उपस्थिती लावली होती. त्यामुळे या समारंभात उपस्थित असणाऱ्या अनेकांचे धाबे दणाणले आहेत. नगरपरिषद कार्यालयाच्या माध्यमातून त्यांच्या संपर्कात आलेल्याची यादी तयार करण्याचे काम रात्री उशिरापर्यंत सुरू होते. खबरदारी म्हणून नगराध्यक्षा जयश्री गाट, मुख्याधिकारी स्नेहलता कुंभार यांच्यासह सर्व नगरसेवक, अधिकारी, कर्मचाऱ्यांची तपासणी करण्यात येणार असल्याचे समजते.