खामकरवाडी-कुरणेवाडी दरम्यानचा बंधारा बनला मृत्यू सापळा

लोकमत न्यूज नेटवर्क

श्रीकांत ऱ्हायकर / धामोड : धामोडपासून गगनबावड्याला जवळचा रस्ता म्हणून धामोड-कुरणेवाडी- खामकरवाडी-म्हासुर्ली या मार्गाची प्रवासी निवड करतात; पण या रहदारीच्या मार्गावर कुरणेवाडी व खामकरवाडीच्या दरम्यान असणारा बंधारा सध्या मृत्यूचा सापळा बनला आहे. या बंधाऱ्याला संरक्षक कठडे नसल्याने गेल्या चार दिवसांत दोन मोठे अपघात झाले आहेत. या बंधाऱ्यांवर संरक्षक कठडे करण्याची मागणी खामकरवाडी-कुरणेवाडी ग्रामस्थांकडून होत असून, ते तत्काळ न केल्यास तीव्र आंदोलन करणार असल्याचा इशारा या दोन्ही गावांतील ग्रामस्थांनी निवेदनाद्वारे दिला आहे.

गगनबावड्याला राधानगरीस जोडणारा हा बंधारा दळणवळणासाठी महत्त्वाचा दुवा आहे. या बंधाऱ्यामुळे संपूर्ण धामणी खोरे आजही तुळशी खोऱ्याशी अखंडपणे जोडलेले आहे. पण २५ वर्षांत एकदाही या बंधाऱ्याची डागडुजी न झाल्याने सध्या या बंधाऱ्याचे पिलर कमकुवत तर झाले आहेतच; शिवाय बंधाऱ्याचे संरक्षक कठडे पूर्णत: मोडले आहेत.

सध्या या मार्गावर वाहनांची प्रचंड वर्दळ सुरू असते. शाळा-कॉलेजला प्रवास करणारे या दोन्ही खोऱ्यांतील विद्यार्थी याच मार्गावरून भोगावती, कोल्हापूर, राधानगरी यांसारख्या ठिकाणी कॉलेजला ये-जा करीत असतात. परिणामी वाहनांची संख्या या मार्गावरून जास्त असताना पाहावयास मिळते. दोन्ही बाजूंनी प्रचंड उतार असल्याने या बंधाऱ्यावर दोन्ही बाजूंनी जोराच्या गतीने वाहने खाली उतरतात. त्यातच या बंधाऱ्याला संरक्षक कठडे नसल्याने वाहनांना ओव्हरटेक करताना वाहन थेट नदीपात्रात कोसळते व अपघात होतात.

गेल्या आठवड्यात या पुलावरून दोन मोटारसायकलस्वार अलगदपणे पुलावरून नदीपात्रात कोसळले. नदीपात्रात पाणी तुंबले असल्याने त्यांना फार इजा झाली नाही . पण एखादे मोठे वाहन या बंधाऱ्यावरून खाली कोसळले तर मोठा अपघात होऊन जीवितहानी होऊ शकते. त्यामुळे या बंधाऱ्यावर संरक्षक कठडे बसविण्यात यावेत, अशी मागणी होत आहे.

फोटो ओळी : खामकरवाडी-कुरणेवाडी दरम्यानचा संरक्षक कठड्याअभावी उभा असलेला हा बंधारा.

छाया - श्रीकांत ऱ्हायकर