गडहिंग्लज शहरातील अनधिकृत डिजीटल बोर्ड हटविले

गडहिंग्लज : प्लास्टिक बंदीपाठोपाठ शहर डिजीटल फलकमुक्त करण्याची मोहीम पालिकेने हाती घेतली आहे. त्यानुसार आज, मंगळवारी शहरातील विविध ठिकाणी अनधिकृतपणे लावलेले १६ मोठे डिजीटल फलक हटविण्यात आले. नगरपालिकेच्या इमारतीसह काही खासगी इमारतींवर जाहिरातीसाठी डिजीटल फलक लावण्यास रितसर परवानगी देण्यात आली आहे. ती ठिकाणेवगळता अन्य ठिकाणी डिजीटल फलक लावण्यासाठी पालिकेच्या पूर्वपरवानगीची गरज आहे.

परंतु, बसस्थानकासमोरील दसरा चौक, आजरा रोड, कडगाव रोड, चर्च रोड, संकेश्वर रोड या परिसरात अनेक ठिकाणी काही शैक्षणिक व सहकारी संस्था, खासगी क्लासेस व जीमचालकांनी मोठ-मोठे डिजीटल फलक अनधिकृतरित्या लावले होते. अनधिकृतरित्या लावण्यात आलेल्या डिजीटल फलकांमुळे शहराच्या सौंदर्याला बाधा येत असल्याच्या तक्रारी होत्या. त्यामुळे नगरपालिका प्रशासनाने अनधिकृत फलक हटविण्याचे आदेश दिले आहेत. त्यानुसार ही कारवाई सुरू आहे. मोठ्या फलकांशिवाय आणखी काही लहान आकाराचे फलक ठिकठिकाणी लावले आहेत. तेही येत्या दोन दिवसांत हटविण्यात येणार आहेत. या मोहिमेत अतिक्रमण विभागप्रमुख रवींद्र जाधव, शामराव वडर, सौरभ लाखे, आकाश सोनटक्के, प्रल्हाद लाखे व निखिल बारामती आदींसह कर्मचारी सहभागी झाले होते.

------------------------------------------

फोटो ओळी : गडहिंग्लज नगरपालिकेने मंगळवारी शहरातील अनधिकृत डिजीटल फलक हटविले. (किल्लेदार फोटो)

क्रमांक : २२१२२०२०-गड-०८