नशिबाने मोडला संसार; महापुराने मोडलेला कणा

प्रयाग चिखली : तीस वर्षांपूर्वी पती वारल्यानंतर अश्रू न ढाळता खंबीरपणे घराची जबाबदारी पेलली. त्यानंतर दोनच वर्षांपूर्वी आधार असणारा मुलगाही नियतीने हिरावला; पण याही परिस्थितीत न डगमगता वरणगे येथील सुशीला गायकवाड यांनी सून रूपाली हिच्या साथीने घराला घरपण दिले. मात्र, महापुरात तेच घर कोसळल्याने सुशीला गायकवाड यांना बेघर होण्याची वेळ आली. वरणगेतील हरिजन वसाहतीमध्ये सुशीला गायकवाड व त्यांची सून रूपाली आपल्या दोन लहान मुलांसोबत राहतात. सुशीला गायकवाड यांचे पती बळवंत गायकवाड यांचे ३० वर्षांपूर्वी निधन झाले; तर मुलगा बाबू येथे दोन वर्षापूर्वी निधन झाले. अशा परिस्थितीत सुशीला गायकवाड व त्यांची सून रूपाली या मोलमजुरी करून चरितार्थ चालवीत आहेत. अशातच महापुरामध्ये घर पडल्यामुळे या कुटुंबासमोर संकटांचा डोंगर उभा राहिला आहे.