एकनाथ शिंदे यांची शिवसेना शहर कार्यालयास भेट

कोल्हापूर : राज्याचे नगरविकास मंत्री एकनाथ शिंदे यांनी शुक्रवारी शिवसेनेचे शहरप्रमुख रविकिरण इंगवले यांच्या कार्यालयास सदिच्छा भेट दिली.

मंत्री शिंदे हे शुक्रवारी काेल्हापूर जिल्ह्याच्या दौऱ्यावर होते. दिवसभर विविध बैठकांना उपस्थिती लावत त्यांनी सायंकाळी शिवसेना शहरप्रमुख रविकिरण इंगवले यांच्या शिवाजी पेठेतील शहर कार्यालयास भेट दिली. यावेळी सहाशेहून अधिक शिवसैनिकांनी भगवे फेटे परिधान करून मंत्री शिंदे यांचे स्वागत केले. यामध्ये महिलांची संख्या लक्षणीय होती. माजी नगरसेविका तेजस्वीनी रविकिरण इंगवले व रविकिरण इंगवले यांनी अंबाबाईची प्रतिमा भेट दिली. मंत्री शिंदे यांनी इंगवले यांच्या प्रभाग क्रमांक ४७ मधील विविध विकासकामांसाठी २५ लाख रुपयांच्या निधीची घोषणा केली. तसेच गांधी मैदानाच्या सुशोभिकरणासाठी निधी उपलब्ध करून देण्याचे आश्वासन दिले.

यावेळी राज्य नियोजन मंडळाचे कार्यकारी अध्यक्ष राजेश क्षीरसागर, शिवसेनेचे पदाधिकारी व नागरिक उपस्थित होते.

फोटो ओळी : राज्याचे नगरविकास मंत्री एकनाथ शिंदे यांनी शुक्रवारी शिवसेनेचे शहरप्रमुख रविकिरण इंगवले यांच्या कार्यालयास सदिच्छा भेट दिली. यावेळी तेजस्वीनी इंगवले, राजेश क्षीरसागर आदी उपस्थित होते. (फोटो-०९०१२०२१-कोल-शिवसेना )