ईराणी खाणीत वृद्धाची आत्महत्या

कोल्हापूर : रंकाळा तलावनजीकच्या ईराणी खाणीत एका वृद्धाने उडी मारून आत्महत्या केली. बाळासाहेब तुकाराम माळी (वय ६३, रा. शिवगंगा कॉलनी, मोरे-मानेनगर, साळोखेनगर, कोल्हापूर) असे आत्महत्या केलेल्या वृद्धाचे नाव आहे. ही घटना रविवारी सायंकाळच्या सुमारास घडली. अग्निशामक दलाच्या रेस्क्यू पथकाच्या वतीने पाण्यात शोधमोहीम राबवली, पण रात्री उशिरापर्यंत मृतदेह हाती लागला नाही. आत्महत्येचे कारण समजू शकले नाही.

पोलिसांनी व घटनास्थळी मिळालेली माहिती अशी की, रंकाळा तलावाच्या पिछाडीस असलेल्या ईराणी खाणीत सायंकाळी अज्ञाताने धावत येऊनच उडी टाकली. यादरम्यान काही लोक खाणीच्या कठड्यावर बसले होते, त्यांच्या समोरच खाणीत उडी मारली. त्यामुळे गोंधळ उडाला. दरम्यान विक्रमनगर येथील ललित शिंदे या तरुणाने धाडसाने पुढे होऊन बुडणाऱ्या व्यक्तीला वाचविण्याचा प्रयत्न केला. पण काही मिनिटांचा उशिर झाल्याने त्यांना वाचवण्यात अपयश आले. काहींनी अग्निशामक दलाला कळविले, त्यांच्या रेस्क्यू पथकाने पाण्यात मृतदेहाच्या शोधासाठी तत्काळ मोहीम राबवली. संबंधित आत्महत्या केलेल्या व्यक्तीचे नाव बाळासाहेब माळी असल्याचे रात्री उशिरा समजले. रात्री उशिरापर्यंत अग्निशमन दलाचे रेस्कू पथकाची शोधमोहीम सुरुच होती. अंधार पडल्याने शोध मोहिमेत अडचणी येऊ लागल्याने शोध मोहीम थांबवली.

दरम्यान, घटनेनंतर खाणीच्या परिसरात नागरिकांची मोठ्या प्रमाणात गर्दी झाली होती. या घटनेची जुना राजवाडा पोलीस ठाण्यात नोंद झाली आहे.