खुटाळवाडी येथील तरुणाची फिल्मी स्टाइलने आत्महत्या

लोकमत न्यूज नेटवर्क

बांबवडे : बांबवडे (ता. शाहूवाडी) येथे पोलीस चौकीच्या समोरील इमारतीवरून फिल्मी स्टाइलने दारूच्या नशेत आत्महत्या करण्याचा प्रयत्न करणाऱ्या गणेश यशवंत चव्हाण (२५), राहणार खुटाळवाडी (ता. शाहूवाडी) या तरुणास प्रसंगावधान राखून लोकांनी वाचवले; परंतु शेवटी गावी खुटाळवाडी येथे जाऊन त्याने आत्महत्या केली. या घटनेची नोंद शाहूवाडी पोलिसांत झाली आहे.

घटनास्थळावरून व पोलिसांकडून मिळालेल्या माहितीनुसार, दुपारी दोनच्या सुमारास गणेश चव्हाण याने पोलीस चौकीच्या समोरील शेळके यांच्या इमारतीच्या गच्चीवरून उडी मारण्याचा प्रयत्न केला. हा फिल्मी थरार लोकांच्या लक्षात आला. त्यातील काही तरुणांनी लगेच इमारतीच्या गच्चीवर धाव घेत लोंबकळत असलेल्या गणेशला वाचविले. त्यानंतर त्याला पोलिसांच्या ताब्यात देण्यात आले. पोलिसांनी त्याला नातेवाइकांच्या स्वाधीन केले व तो आपल्या खुटाळवाडी या गावी गेला. तेथे साडेचारच्या सुमारास तळ्याशेजारील चिंचेच्या झाडाला गळफास घेऊन गणेशने आत्महत्या केली. यावेळी तळ्याकडे जाणाऱ्या गणेशला वाचवण्यासाठी लोक त्याच्या पाठीमागून जात होते; परंतु तोपर्यंत त्याने आत्महत्या केली.

गणेश हा एकुलता एक असून तो अविवाहित आहे. त्याच्या पश्चात आई व एक विवाहित बहीण आहे. दारूच्या नशेत त्याने आत्महत्या केली असावी, असा अंदाज पोलिसांनी व्यक्त केला. पुढील तपास शाहूवाडी पोलीस करत आहेत.

फोटो २२बांबवडे तरुण

बांबवडे येथे फिल्मी स्टाइलने आत्महत्या करत असताना स्थानिकांनी गणेशला वाचविले होते.