पॅकर्स स्पोर्टसह फौंडेशनची बाजी

कोल्हापूर : जिल्हा क्रिकेट असोसिएशनतर्फे सुरू असलेल्या टी-२० क गट क्रिकेट स्पर्धेत शनिवारी पॅकर्स क्रिकेट क्लब व पॅकर्स स्पोटर्स फौंडेशनने प्रतिस्पर्धी संघावर मात करीत पुढील फेरी गाठली.

राजाराम काॅलेज मैदानावर शनिवारी पहिल्या सामन्यात पॅकर्स क्रिकेट क्लबने गोकुळ दूध संघाचा ८८ धावांनी पराभव केला. यात प्रथम फलंदाजी करताना पॅकर्स क्लबकडून अनिमेश राॅयने ८४ व एकलव्य खाडेने ४० धावा करीत संघाची धावसंख्या १७१ नेली. गोलंदाजी करताना गोकुळकडून अनिल पाटीलने दोन बळी घेतले. उत्तरादाखल खेळताना गोकुळ संघास हे आव्हान पेलवले नाही. त्यांचा सर्व संघ १४.१ षटकांत ८३ धावांत गुंडाळला. पॅकर्स क्लबकडून जुनेद मलबारी , कार्तिक पाटील यांनी भेदक गोलंदाजी करीत प्रत्येकी दोन बळी घेतले.

दुसऱ्या सामन्यात पॅकर्स स्पोर्टस फौंडेशनने बबन पाटील ॲकॅडमीचा ८२ धावांनी पराभव केला. प्रथम फलंदाजी करताना पॅकर्स फौंडेशनने २० षटकांत ९ बाद १५५ धावा केल्या. यात शुभम मोहरकरने ४९, पृथ्वीराज उन्हाळकरने १९, संतोष राजगोळकरने १७ , आयुष सक्सेना याने नाबाद १४ धावा केल्या. गोलंदाजी करताना पाटील ॲकॅडमीकडून ऋत्विक वाझे याने तीन, आशिष पुजारी व विनोद कोळी यांनी प्रत्येकी दोन बळी घेतले. उत्तरादाखल खेळताना पाटील ॲकॅडमीला हे आव्हान पेलवले नाही. त्यांचा सर्व संघ १३.४ षटकांत सर्वबाद ७३ गारद झाला. यात मानतेश मेकेरी याने २४ धावा केल्या.