जुगार अड्ड्यावर छापा तेरा जणांना अटक

गारगोटी,

शेणगाव (ता. भुदरगड) येथे तीनपानी जुगारअड्ड्यावर भुदरगड पोलिसांनी छापा मारून सहा मोटारसायकल, अकरा मोबाइल फोनसह चार लाख बावीस हजार एकशे वीस रुपयांचा मुद्देमाल जप्त केला. याप्रकरणी तेरा जणांवर गुन्हा दाखल करून अटक करण्यात आली आहे.

अधिक माहिती अशी, बुधवारी (दि २३) रोजी रात्री दहाच्या सुमारास शेणगांव ( ता.भुदरगड) येथील गावाबाहेर वीटभट्टीच्या परिसरात परसू कुंभार यांच्या पत्र्याच्या शेडमध्ये शिवारात काही लोक जुगार खेळत असल्याची माहिती पोलीस निरीक्षक संजय मोरे यांना लागली. त्यांनी सहाय्यक पोलीस निरीक्षक सतीश मयेकर आणि पोलीस कर्मचाऱ्यांच्या सोबत सापळा रचून अड्ड्यावर छापा टाकून ४ लाख २२ हजार १२० रुपयाच्या मुद्देमालासह १३ आरोपींना अटक केली. याबाबतची फिर्याद जयसिंग शिंदे पोलीस यांनी दाखल केली.

याप्रकरणी संजय एकल, सुनील नागवेकर, संजय कुंभार, नारायण खटावकर, जयसिंग कुंभार (सर्वजण रा. शेणगांव), धनाजी पावले ,मिलिंद शुक्ल, शैलेश गुरव,दिलीप वडर (हे सर्वजण रा गारगोटी),अशोक टाकवडेकर ( रा.देवकेवाडी), रवींद्र लोहार, कृष्णात सुतार, संतोष कडव (हे सर्वजण, रा. आकुर्डे) असे हे तेरा आरोपी आहेत. त्यांना अटक करण्यात आली आहे.