गर्दीत महिलांचे दागिने लुटणाऱ्या चार महिलांची टोळी अटक

कोल्हापूर : गर्दीच्या ठिकाणी महिलांचे लक्ष विचलित करून हातचलाखीने पर्समधील अथवा गळ्यातील सोन्याचे दागिने लांबविणारी परप्रांतीय चार महिलांची टोळी उजेडात आली. स्थानिक गुन्हे अन्वेषण पथकाने गुजरी कॉर्नर येथे सापळा रचून त्यांना अटक केली. त्या मूळच्या कर्नाटक राज्यातील असून, त्यांच्याकडून सुमारे साडेपाच लाख रुपये किमतीचे ११ तोळे चोरीचे दागिने जप्त केले.

अटक संशयित महिलांची नावे : पूजा अर्जुन सकट (वय ३०), अर्चना चंद्रकांत चौगुले (२१, रा. रा. बुद्धनगर, रेणुका मंदिरनजीक, निपाणी, कर्नाटक), सुवर्णा विशाल सकट (३०), मंदा सुवर्णा सकट (२८, दोघेही रा. टेंबलाई उड्डाण पुलाजवळ झोपडपट्टी, टाकाळा).

मंदिर, बसस्थानक अशा गर्दीच्या ठिकाणी महिलांचे दागिने चोरीच्या घटना वाढल्याने पोलीस अधीक्षक शैलेश बलकवडे यांनी दिलेल्या सूचनेनुसार स्थानिक गुन्हे अन्वेषण पथकाचे निरीक्षक तानाजी सावंत यांनी पथके नेमली. चार संशयित चोरट्या महिला गुजरी येथे येणार असल्याची माहिती मिळाली. पोलिसांनी सापळा रचून चौघींना अटक केली. त्या कर्नाटकातील असून, टेंबलाई उड्डाणपूल येथे तात्पुरत्या राहत होत्या. त्यांच्या अंगझडतीत सुमारे साडेपाच लाख रुपये किमतीचे सुमारे ११ तोळे सोन्याचे दागिने जप्त केले.

किरण गावडेंची खात्रीशीर माहिती

स्थानिक गुन्हे अन्वेषण पथकातील पोलीस किरण गावडे यांना गारगोटी एस.टी. स्टँडवरील सीसी टीव्ही फुटेजमध्ये दिसणाऱ्या चार महिला गुजरी कॉर्नर येथे दागिने विकण्यासाठी येणार असल्याची माहिती मिळाली. पोलीस विजय कारंडे, श्रीकांत मोहिते, सहायक पोलीस उपनिरीक्षक विजय गुरखे, हे. कॉ. उत्तम सडोलीकर, किरण गावडे, प्रदीप पोवार, वैशाली पाटील, सुप्रिया कात्रट, सारिका मोटे यांनी सापळा रचून अटक केली.

गारगोटी, आदमापुरातील चोऱ्या उघड

अटकेतील महिलांच्या टोळीने दि. १४ डिसेंबरला गारगोटी एस.टी. स्टँड व आदमापूर येथील बाळूमामा मंदिरात महिलांना सोन्याचे दागिने चोरल्याचे उघडकीस आले. दरम्यान, त्यांच्याकडून महाद्वार रोडवरील आणखी चोऱ्या उघडकीस येण्याची शक्यता आहे.

फोटो नं. ०९०१२०२०-कोल-चोरी०१

ओळ : स्थानिक गुन्हे अन्वेषण पथकाने कोल्हापुरातील गुजरी येथे अटक केलेल्या चौघा महिलांच्या टोळी करून जप्त केलेले चोरीचे सोन्याचे दागिने.

फोटो नं. ०९०१२०२०-कोल-पूजा सकट (आरोपी-चोरी)

फोटो नं. ०९०१२०२०-कोल-अर्चना चौगुले (आरोपी-चोरी)

फोटो नं. ०९०१२०२०-कोल-सुवर्णा जाधव (आरोपी-चोरी)

फोटो नं. ०९०१२०२०-कोल-मंदा सकट (आरोपी-चोरी)