शाहू महाराज यांच्यावर शुभेच्छांचा वर्षाव

वाढदिवस साजरा : प्रेक्षकांना फुटबॉलची भेट; मैदानात केक कापला

कोल्हापूर : कोल्हापूर स्पोर्टस् असोसिएशन आणि विविध संस्थांचे आश्रयदाते श्रीमंत छत्रपती शाहू महाराज यांचा ६८ वा वाढदिवस छत्रपती शाहू विद्यालय, नवीन राजवाडा येथे गुरुवारी मोठ्या उत्साहात पार पडला. विविध मान्यवरांनी त्यांच्यावर शुभेच्छांचा वर्षाव केला.
गुरुवारी सकाळी छत्रपती शाहू विद्यालय येथे विद्यार्थी व एनसीसी छात्रांनी प्रथम महाराजांना मानवंदना दिली. त्यानंतर विद्यार्थी व शिक्षक, कर्मचारी आणि उपस्थितांसमवेत केक कापण्यात आला. सायंकाळी शाहू स्टेडियम येथेही फुटबॉलप्रेमींच्यावतीनेही केक कापून वाढदिवस साजरा करण्यात आला. यावेळी वाढदिवसानिमित्त छत्रपती मालोजीराजे यांनी केएसए लीग स्पर्धेतील विजेत्या संघाला ३१ हजार रुपये, तर उपविजेत्या संघाला २१ हजार रुपये बक्षीस जाहीर केले आहे. तर श्रीमंत छत्रपती मालोजीराजे यांच्या हस्ते १७ वर्षांखालील भारतीय संघात निवड झालेल्या निखिल कदमला २५ हजार रुपये देऊन गौरविण्यात आले.
यावेळी श्रीमंत छत्रपती शाहू महाराज यांच्या हस्ते ‘व्हिवा’ फुटबॉल मासिकाचे प्रकाशन करण्यात आले. याप्रसंगी संभाजीराजे छत्रपती, मालोजीराजे, मधुरिमाराजे छत्रपती, विरोधी पक्षनेते संभाजी जाधव, जर्मनीचे अँड्रोज सोमाच्युक, मार्टिना, पै. बाबा महाडिक, यांच्यासह ‘केएसए’चे पदाधिकारी दीपक जाधव, माणिक मंडलिक, नंदकुमार बामणे, सरदार मोमीन, फुटबॉलपटू अनिकेत जाधव आदी उपस्थित होते.


प्रेक्षकांना २३ फुटबॉलची अनोखी भेट....
गुरुवारी दुपारी केएसए व फुटबॉलप्रेमींच्यावतीने श्रीमंत छत्रपती शाहू महाराज यांचा केक कापून वाढदिवस साजरा करण्यात आला. वाढदिवसानिमित्त फुटबॉल सामन्याचे तिकीट काढताच प्रत्येकाला एक आइस्क्रीमचा कप देण्यात येत होता. तसेच महाराजांच्या वाढदिवसाचे औचित्य साधून ‘केएसए’च्यावतीने मैदानातून प्रेक्षक गॅलरीकडे २३ नवीन फुटबॉलला कीक मारून फुटबॉलप्रेमींना वाढदिवसाची अनोखी भेट दिली.
शाहू स्टेडियम येथे गुरुवारी श्रीमंत छत्रपती शाहू महाराज यांनी वाढदिवसानिमित्त केक कापला. शेजारी युवराज मालोजीराजे, संभाजीराजे, नगरसेवक संभाजी जाधव, जर्मनीचे अँड्रोज सोमाच्युक, मार्टिना, दीपक जाधव, माणिक मंडलिक, नंदकुमार बामणे, सरदार मोमीन, आदी उपस्थित होते.