पाण्याचा वेढा पडणाऱ्या गावांसाठी यंत्रणा तयार ठेवा

कोल्हापूर : जिल्ह्यात चांगला पाऊस होत असून अतिवृष्टी व पूरपरिस्थिती निर्माण झाल्यास पाण्याचा वेढा पडण्याची शक्यता असलेल्या गावांना मदत पोहोचवण्यासाठी गावनिहाय आराखडा तयार ठेवण्याचे आदेश जिल्हाधिकारी राहुल रेखावार यांनी मंगळवारी दिले. जिल्हाधिकारी कार्यालयात पूरपरिस्थितीच्या आढावा बैठकीत ते बोलत होते.

या वेळी पोलीस अधीक्षक शैलेश बलकवडे, जिल्हा परिषदेचे मुख्य कार्यकारी अधिकारी संजयसिंह चव्हाण, निवासी उपजिल्हाधिकारी भाऊ गलांडे, सार्वजनिक बांधकाम विभागाचे अधीक्षक अभियंता संभाजी माने, महापालिकेचे अतिरिक्त आयुक्त नितीन देसाई, पाटबंधारे विभागाचे कार्यकारी अभियंता रोहित बांदिवडेकर, जिल्हा आपत्ती व्यवस्थापन अधिकारी प्रसाद संकपाळ तसेच विविध विभागांचे अधिकारी उपस्थित होते.

जिल्हाधिकारी रेखावार म्हणाले, पावसाळ्यात रस्ते व पूल पाण्याखाली जाऊन वाहतुकीला अडथळा होतो, त्या परिस्थितीतही काही नागरिक पूल ओलांडण्याचा प्रयत्न करतात व अपघाताची शक्यता असते त्यामुळे पुराचे पाणी आलेले रस्ते बॅरिकेड्स लावून बंद करा. वाहतूक पर्यायी मार्गाने वळवावी. जिल्ह्यातील पाझर तलाव सुस्थितीत असल्याची खात्री करा. महावितरण विभागाने आवश्यक साहित्याची देखभाल, दुरुस्ती करून घ्यावी. गरजेनुसार मनुष्यबळ व अधिकचे साहित्य तयार ठेवावे. अतिवृष्टी व वादळी वाऱ्यामुळे वीजपुरवठा खंडित झाल्यास त्वरित वीजपुरवठा पूर्ववत करण्यासाठी आवश्यक साधनसामग्री व मनुष्यबळ तयार ठेवा.

पोलीस अधीक्षक शैलेश बलकवडे म्हणाले, पूरबाधित गावात महसूल, पोलीस, आरोग्य व अन्य संबंधित विभागांनी समन्वयाने काम करावे. मुख्य कार्यकारी अधिकारी संजयसिंह चव्हाण यांनी आपत्कालीन परिस्थितीत नागरिकांना लगेच मदत मिळवून देण्याच्या दृष्टीने जिल्हा परिषदेच्या विविध विभागांनी केलेल्या तयारीची माहिती दिली. आपत्ती व्यवस्थापन अधिकारी प्रसाद संकपाळ यांनी जिल्हा प्रशासनाच्यावतीने करण्यात येत असलेल्या तयारीची माहिती दिली.

---

आपदा मित्र, सखीचे कौतुक

जिल्हाधिकाऱ्यांनी पूर व आपत्कालीन परिस्थितीत नागरिकांच्या मदतीसाठी प्रशासनासोबत कार्यरत असलेल्या स्वयंसेवी संस्थांतील स्वयंसेवकांच्या कामाचे कौतुक करत कठीणप्रसंगी मदतकार्य करणाऱ्या स्वयंसेवकांचे काम प्रेरणादायी असल्याचे सांगितले. त्यांच्या हस्ते आपदा सखी शुभांगी घराळ हिचा सत्कार करण्यात आला.

--

एकही जनावर वाहून जाता कामा नये

बाधित होणाऱ्या गावांतील नागरिकांना आधीच सूचना द्या. त्यांच्यासाठी पुरेसे अन्नधान्य व औषधसाठा उपलब्ध ठेवा. एकही जनावर वाहून जाऊ नये असे काटेकोर नियोजन करा. छावणीतील जनावरांसाठी पुरेसे पशुखाद्य, ओला व सुका चारा, औषधसाठा तयार ठेवा असेही जिल्हाधिकाऱ्यांनी स्पष्ट केले.

---

भूस्खलन होणाऱ्या रस्त्यांची दुरुस्ती करून घ्या

-भूस्खलनामुळे नागरिकांना इजा होऊ नये, यासाठी उपाययोजना करा.

-पुरात अडकलेल्या लोकांच्या मदतीसाठी प्रशिक्षित बचाव पथके तयार ठेवा.

---

फाेटो नं २००७२०२१-कोल-पूर आढावा

ओळ : कोल्हापूर जिल्ह्यातील अतिवृष्टी व संभाव्य पूरस्थितीच्या पार्श्वभूमीवर जिल्हाधिकारी राहुल रेखावार यांनी मंगळवारी जिल्हा आपत्ती व्यवस्थापन यंत्रणेतील आपदा मित्र व आपदा सखींची भेट घेऊन त्यांच्या कामाचे कौतुक केले.

---