सामाजिक बांधीलकीतून ‘जिजाऊ’ हॉस्पीटलसाठी मदत करा : सुभाष देशमुख

भागभांडवल गोळा करण्यास सुरूवात

 आॅनलाईन लोकमत

कोल्हापूर, दि. 0४ : कोल्हापूर शहरात सुरू होणाऱ्या ‘राजमाता जिजाऊ को. आॅप. हॉस्पीटल’ला सामाजिक बांधीलकीतून मदत करा, असे आवाहन सहकार मंत्री सुभाष देशमुख यांनी केले. उद्योजकांबरोबरच मोठ्या सहकारी संस्थांकडून भागभांडवल घेऊन गोरगरीब रूग्णांना मोफत सेवा द्या, असेही त्यांनी सागिंतले.

सहकार विभागाच्या वतीने कावळा नाका येथे ‘राजमाता जिजाऊ को. आॅप हॉस्पीटल’ सुरू होत आहे. त्याची आढावा बैठक मंत्री देशमुख यांनी रविवारी घेतले. सामान्य माणसांकडून एक हजाराचा शेअर्स घेऊन त्यांना उपचारात किती सवलत देणार? वैद्यकीय क्षेत्राशी स्पर्धा करत चांगली सेवा द्यायची म्हटले तर सवलतीवर मर्यादा येणार आहे. त्यासाठी मोठ्या संस्था व उद्योजकांनी भागभांडवल द्यावे. कोल्हापूरांनी मनात आणले तर काहीच अशक्य नाही. आपल्या व्यवसायातील अगदी अत्यल्प निधी हॉस्पीटलसाठी दिला तर चांगले हॉस्पीटल उभे राहील. असे मंत्री देशमुख यांनी सांगितले.

संकल्पना चांगली आहे, पण नियमित हॉस्पीटल सारखे सुरू केले तर त्याचा फायदा सामान्यांना होणार नाही. त्यापेक्षा मल्टिस्पेशालिटी हॉस्पीटल उभे राहिले तर अधिक चांगले असल्याचे डॉ. अशोक चौगुले यांनी सांगितले. ‘गोकुळ’चे संचालक अरूण डोंंगळे, अनिल नागराळे, सुरेंद्र जैन, अविनाश महागांवकर यांनी मनोगत व्यक्त केले. जिल्हा उपनिबंधक अरूण काकडे यांनी हॉस्पीटलची संकल्पना सांगितली. सुनिल सुर्यंवंशी यांनी आभार मानले.

‘म्हाडा’चे अध्यक्ष समरजीतसिंह घाटगे, प्रा. संजय मंडलिक, बाबा देसाई, नामदेवराव भोईटे, पंडीतराव केणे, संजय जोशी, आर. डी. देसाई आदी उपस्थित होते.

परदेशात पैसे ठेवायला पैसे मोजावे लागतात

परदेशात उद्योजकांना ४ टक्के दराने कर्जे दिली जातात,त्याच धर्तीवर आपल्याकडे द्यावीत अशी मागणी सुरेंद्र जैन यांनी केली. यावर परदेशात कमी व्याजाने कर्जे दिली जातात, हे जरी खरे असले तरी तिथे पैसा इतका आहे. पैसे ठेवायसाठी पैसे मोजावे लागतात, असे मंत्री देशमुख यांनी सांगितले.

‘त्या’ संस्था मोडकळीस आल्या!

केवळ सरकार मदतीवर उभ्या राहिलेल्या संस्था लवकर मोडकळीस येतात, हा अनुभव आहे. त्यासाठी सरकारी पैशाबरोबर जनता असेल तर त्याला यश येते, असे देशमुख यांनी सांगितले.

सुरेश पाटील यांच्याकडून एक लाख उद्योजक

सुरेश पाटील यांनी हॉस्पीटल उभारणीसाठी एक लाख रूपये मदत जाहीर केली. त्याचबरोबर ‘बिद्री’ साखर कारखान्याने ४८८ कर्मचाऱ्यांच्या माध्यमातून ४ लाख ९८ हजाराचे भागभांडवल जमा केले