इचलकरंजी महत्त्वाचे संक्षिप्त

इचलकरंजी : शहरातील विविध १९ ठिकाणी २६ जणांचा कोरोना अहवाल पॉझिटिव्ह आला. संग्राम चौक ४, शहापूर, नदीवेस, भारतमाता हाउसिंग सोसायटी, इंदिरा हाउसिंग सोसायटी येथील प्रत्येकी दोन, बंडगर माळ, श्रद्धा कॉलनी, बावणे गल्ली, शाहू हायस्कूलजवळ, मंगळवार पेठ, कागवाडे मळा, वृंदावन कॉलनी, एएससी कॉलेजजवळ, स्टेशन रोड, जवाहरनगर, जयभीमनगर, आर.के.नगर, गावभाग, विकासनगर येथील प्रत्येकी एकाचा समावेश आहे. आतापर्यंत चार हजार ४७१ जणांना कोरोनाची लागण झाली असून, चार हजार १८ जण बरे झाले आहेत. २५२ जणांवर उपचार सुरू असून, मृत्यूसंख्या २०१ वर स्थिर आहे.

तरुणाची आत्महत्या

इचलकरंजी : काम करता येत नसल्याच्या नैराश्येतून येथील रिंग रोड परिसरात राहणाऱ्या एका तरुणाने घरातील लोखंडी अँगलला नायलॉनच्या दोरीने गळफास लावून घेऊन आत्महत्या केली. अनिकेत अशोक कोळी (वय २१), असे त्याचे नाव आहे. याबाबतची वर्दी सदाशिव शामराव कोळी यांनी गावभाग पोलिसांत दिली आहे.

एअर कॉम्प्रेसरच्या दुकानास आग

इचलकरंजी : येथील स्टेशन रोडवरील एका एअर कॉम्प्रेसरच्या दुकानास किरकोळ आग लागली. हाकेच्या अंतरावर असलेल्या अग्निशामकच्या दोन गाड्यांनी ही आग आटोक्यात आणली. त्यामुळे आगीमध्ये किरकोळ नुकसान झाले. अनिरुद्ध भागवत यांचे कॉम्प्रेसरचे दुकान आहे. कोरोनाच्या पार्श्वभूमीवर दुकान बंद होते; परंतु आतील काम सुरू असल्याने ही आग अचानक लागल्याचे समजले.